Երեկ ստացանք ահազանգ՝ սուպերմարկետում հերթ էր. Երևանի քաղաքապետի տեղակալ

«Հենց երեկ ստացանք ահազանգ, որ մի մեծ սուպերմարկետում մարդկանց կուտակում է եղել: Զանգահարել ենք ու կարգավորել իրավիճակը»,- ասաց Երևանի քաղաքապետարանի վարակի կանխարգելման գործողությունները համակարգող օպերատիվ շտաբի ղեկավար, քաղաքապետի տեղակալ Սերգեյ Հարությունյանը: «Մենք անընդհատ կապի մեջ ենք մասնավոր տնտեսվարողների հետ: Նրանց անընդհատ հորդորում ենք խիստ վերահսկողություն սահմանել, թույլ չտալ, որ քաղաքացիները խախտեն սահմանափակումները: Բայց քաղաքացիներն էլ պետք է գիտակցեն, որ իրենցից շատ բան է կախված»: Շտաբի ղեկավարը, անդրադառնալով Երևանի քաղաքապետարանի ենթակայության տակ գտնվող մեկուսարանների և բուժհաստատությունների մասին հնչած հարցին, ասաց, որ գրեթե բոլոր տարածքներով առողջապահության նախարարությունն է զբաղվում: «Երևանի քաղաքապետարանի կողմից առանձնացվել է Սուրբ Աստվածամայր բժշկական կենտրոնի ծննդատան հատվածը, որը վերազինվել է և միայն կորոնավիրուսի վարակակիրներին է սպասարկում, հատկապես միջին և ավել ծանրության: Առանձնացված հատվածի ղեկավարից տեղեկացել ենք, որ 150 և ավելի մահճակալներ կան: Այլ մեկուսարաններ և տարածքներ Երևանի քաղաքապետարանի ենթակայության տակ, չկան»: Շտաբի ղեկավարը նշեց, որ բոլոր բազմաբնակարան շենքերը ախտահանվում են, սակայն, եթե կան շենքեր, որտեղ չեն այցելել քաղաքապետարանի աշխատակիցները, բնակիչները պետք է զանգահարեն թեժ գծին: