Ադրբեջանը գնել է 4++ սերնդի գերժամանակակից կործանիչներ. դրանք կարող են միառժամանակ 8 օդային թիրախ խոցել

Ադրբեջանի զինված ուժերը մի քանի օր առաջ պամանագիր են ստորագրել, որպեսզի ձեռք բերեն երկու տիպի գերժամանակակից կործանիչներ: Այս մասին ԼՈՒՐԵՐ.com-ի հետ զրույցում ասաց ռազմական փորձագետ Վան Համբարձումյանը: «Խոսքը գնում է 4++ սերնդի կործանիչների մասին և համեմատության համար կարող եմ ասել, որ հայկական կողմի նախորդ տարեվերջին ձեռք բերած կործանիչները 4+ սերնդի են, այսինքն՝ ադրբեջանական կողմինը շատ ավելի հզոր են, խոսքը Սու 35 Ս կործանիչների մասին է, որոնք գնել են Ռուսաստանից»,-նշեց փորձագետը: Համբարձումյանը տեղեկացրեց, որ այդ կործանիչները ռուսական կողմն ի սկզբանե արտադրել է Ինդոնեզիայի համար, սակայն մի քանի շաբաթ առաջ Ինդոնեզիան հրաժարվել է գնել. «ՌԴ-ին խիստ անհրաժեշտ էր վաճառել արդեն իսկ արտադրված այդ կործանիչները, իսկ ադրբեջանական կողմը դրանք վաղուց էր ցանկանում ձեռք բերել: Հատկանշական է, որ ռուսական կողմը տևական ժամանակ մերժել է Ադրբեջանին՝ այդ կործանիչները վաճառելու հարցում, այսինքն՝ չի վաճառել: Կործանիչները շատ հզոր են և կարող են մինչև 3000 կիլոմետր մարտական թռիչքներ իրականացնել: Հենց այդ փաստն է վախեցրել Ռուսաստանին, քանի որ չես իմանա, թե կործանիչները ինչ նպատակով, ում դեմ կօգտագործեն»: Փորձագետն ընդգծեց, որ  Ադրբեջանի այս ձեռքբերումը շատ լուրջ մտածելու տեղիք է Հայաստանի իշխանությունների համար: «Նոր գնած կործանիչները կարող են միառժամանակ 8 օդային թիրախ խոցել և որքանով հասկանում եմ՝ ադրբեջանական կողմը ցանկանում է 12 հատ ձեռք բերել՝ յուրաքանչյուրի համար վճարելով, մոտավորապես, 50 մլն դոլար: Այդ կործանիչները խոցում են վերգետնյա, շարժական և ստացիոնար թիրախներ, գիշերը թե ցերեկը, նաև վերջրյա թիրախներ կարող են խոցել, այսինքն՝ նավերը»,-ընդգծեց նա: Համբարձումյանի խոսքով, հայկական կողմի համար շատ լուրջ մտածելու խնդիր է.«Հնարավոր է ցավոտ հնչի, բայց ռազմական տեխնիկայի առումով՝ բալանսը խախտված է և այս տեխնիկան, մտնելով ադրբեջանական զինանոց, էլ ավելի է հզորացնում նրանց բանակը»: Փորձագետը հայտնեց, որ  կողմերի միջև պայմանագիրն արդեն իսկ կնքված է, իսկ կործանիչները՝ պատրաստ են, հետևաբար շատ հնարավոր է, որ կործանիչները մոտ ապագայում լինեն Ադրբեջանում: «Ադրբեջանի ռազմաօդային ուժերը հեշտությամբ կարող են օգտագործել, կիրառել այդ կործանիչները, քանի որ նմանատիպ կործանիչներ օգտագործելու փորձառություն ունեն»,-հավելեց նա: Փորձագետը նշեց, որ կործանիչի մյուս տեսակը Ադրբեջանը ձեռք է բերել Պակիստանից, որը ևս շատ հզոր կործանիչ է.«Նոր ձեռբերումներն էլ ավելի են հզորացնում Ադրբեջանի ռազմաօդային ուժերը: Հայկական կողմը պետք է հակաքայլեր ձեռնարկի՝ քաղաքական դաշտից մինչև հակաօդային պաշտպանության հզորացում»:  Լուսինե Մարդոյան