Ըստ «ՍԿԱՅ ԳՐՈՒՊ»-ի՝ օդանավակայանի հայտարարած տենդերն անցնում է խախտումներով. կազմակերպության փոխտնօրենը անուններ կհնչեցնի

Հետևելով ««Արմենիա» Միջազգային Օդանավակայաններ» ՓԲԸ-ի կողմից հայտարարված «Զվարթնոց» միջազգային օդանավակայանի շենքերի և տարածքների մաքրման (այդ թվում՝ սանիտարական) աշխատանքների կազմակերպման և իրականացման համար փետրվարի 3-ին հայտարարված մրցույթի շուրջ տեղի ունեցած խմորումներին՝ ԼՈՒՐԵՐ.com-ը կրկին զրուցեց «ՍԿԱՅ ԳՐՈՒՊ» կազմակերպության փոխտնօրեն Անի Մաթևոսյանի հետ: Նրա պնդմամբ՝ ապրիլի 13-ին հեռախոսազրույց է ունեցել օդանավակայանի գլխավոր մենեջեր Մարսելո Վենդեի հետ, որը, չնայած համատեղ պայմանավորվածության, պետք է կայանար ժամը 12:00-ին, սակայն օդանավակայանից իր հետ կապ հաստատեց տեղական ժամանակով 13:13-ին: Հեռախոսազրույցը տեղի է ունեցել թարգմանչի ներկայությամբ, որը հայերենից անգլերեն և հակառակը թարգմանություն է կատարել ամբողջ զրույցի ընթացքում։ Անի Մաթևոսյանի կողմից բարձրաձայնվել էին բոլոր կասկածները և հուզող հարցերը՝ տվյալ մրցույթի գործընթացի և արդյունքների վերաբերյալ: Զրույցի մանրամասների մասին նա խոստացավ մի քանի օրվա ընթացքում բարձրաձայնել: Նա նաև նշեց, որ Մարսելո Վենդեի առաջարկով ունեցել է նաև հեռախոսազրույց Արմեն Տեր-Տաճատյանի հետ, որը հանդիսանում է «Տեր-Տաճատյան» իրավաբանական խորհրդատվական ՓԲԸ հիմնադիր-տնօրեն և «Կոնվերս Բանկ» ՓԲԸ -ի խորհրդի նախագահ: Այդ զրույցի մանրամասները նա խոստացավ բարձրաձայնել մոտակա օրերի ընթացքում: «ՍԿԱՅ ԳՐՈՒՊ» ՍՊԸ-ի ներկայացուցիչ Անի Մաթևոսյանն ասաց, որ այս իրադարձությունների շրջանակում նաև կհայտնի այն մեկ պաշտոնատար անձի և երկու նախկին պաշտոնատար անձանց անունները, որոնք աշխատում և նախկինում աշխատել են ««Արմենիա» Միջազգային Օդանավակայաններ» ՓԲԸ- ում, որոնց հովանավորության և բարեկամական փոխկապակցվածության ներքո տարիներ շարունակ գործել է «ՖԵԿԱ ԼՅՈՒՔՍ» կազմակերպությունը՝ կատարելով օդանավակայանում մաքրման աշխատանքներ: Նա ասաց, որ պատրաստվում է դիմել ՀՀ վարչապետի աշխատակազմին և բոլոր իրավապահ մարմիններին ««Արմենիա» Միջազգային Օդանավակայաններ» ՓԲԸ-ում կատարվող մրցույթների, գործող պայմանագրերի և անփոփոխ առկա կազմակերպությունների և պաշտոնատար անձանց բարեկամական, ընկերական և այլ փոխկապակցվածության փաստերը հայտնաբերելու վերաբերյալ: Մենք բոլորս պետք է պայքարենք անօրինական, մոնոպոլ և կոռուպցիոն համակարգերի դեմ բոլոր ոլորտներում: Նշենք որ մեր հարցման արդյունքում ստացանք գրավոր պատասխան ՀՀ գնումների հետ կապված բողոքները քննող անձից՝ Գրիգոր Ներսիսյանից, որտեղ նշված էր, որ տվյալ բողոքի քննությունը դեռ իրականացվում է և, որ բողոքի վերաբերյալ որոշումը կհրապարակվի 30 օրացույցային օրվա ընթացքում՝ բողոքի վարույթը ընդունելու պահից: Հետևենք զարգացումներին։ Ավելի վաղ գրել էինք, որ «Զվարթնոց» միջազգային օդանավակայանի շենքերի և տարածքների մաքրման աշխատանքների կազմակերպման համար հայտարարված մրցույթին մասնակցող ընկերությունները 4-ն էին` «SKY GROUP» ՍՊԸ-ն, «FEKA LUXS» ՍՊԸ-ն, «CLEANERS» ՍՊԸ-ն և «CLEAN LINE» ՍՊԸ-ն: Ուշագրավ է, որ շուրջ 10 տարվա ընթացքում նշված ծառայություններն իրականացնելու համար երբևիցե մրցույթ չի հայտարարվել և պայմանագիրը կնքվել է միայն «ՖԵԿԱ-ԼՅՈՒՔՍ» ՍՊԸ-ի հետ, սակայն այս տարի որոշվել է մրցույթ հայտարարել, որն արդեն իսկ արդար ընթացք չի նշմարում: