Քաղավիացիայում հայտնաբերված թերությունները կապ չունեն նոր ղեկավարության հետ. Տաթևիկ Ռևազյան

«Վերջերս անընդհատ սխալ տեղեկություններ են շրջանառվում, թե Եվրոպայի միության կողմից հրապարակված զեկույցում առկա թերությունները վերջին երկու տարում են առաջ եկել: Ես վստահ կարող եմ ասել, որ զեկույցում ոչ մի ձևով նման բան ասված չէ»,- լրագրողների հարցին ի պատասխան՝ ասաց Քաղավիացիայի կոմիտեի նախագահ Տաթևիկ Ռևազյանը: Ռևազյանը նշեց, որ զեկույցում փետրվարի յոթից ինն ընկած հատվածում կատարված այցի ընթացքում նկատված թերություններն են զետեղվել, սակայն խնդիրներն ավելի խորքային են: «Մենք, ընդհակառակը, ԵՄ ղեկավարության կողմից ունենք հայտարարություն, որը կարող ենք հրապարակել: Հայտարարության մեջ ղեկավար կազմը նշում է, որ թերացումներն ընդհանրապես կապ չունեն նոր ղեկավարության հետ»: Հարցուպատասխանին միացած Գալուստ Պողոսյանն, ով կոմիտեի փոխնախագահն է, ներկայացրեց զեկույցում նշված խնդիրները: «Վերհանված թերությունները տարատեսակ են, շատ են վարչությունների կազմակերպչական հարցերին վերաբերող խնդիրները, իրենք հորդորում են ներդնել մեկ միասնական գործելաոճ՝ բոլոր վարչությունների համար, անընդհատ կազմել զեկույցներ և արձանագրություններ՝ ամեն քայլի վերաբերյալ»: Փոխնախագահի խոսքով՝ աշխատանքներն իրականում արված են, պարզապես այլ ոճով, գուցե նաև մասնակի, հենց դա էլ Եվրոպական միության մտահոգության պատճառն է դարձել: Ռևազյանն, անդրադառնալով թերացումների լուծման ուղիներին, ասաց, որ մտածելակերպի հարց է, աշխատակիցները պետք է սկսեն այդկերպ մտածել ու հարցը լուծել ոչ թե հեռախոսի միջոցով, այլ՝ արձանագրելով: «Տարիներ շարունակ տվյալների հավաքագրումը միևնույն հարթակում չի եղել,  դրա համար հիմա փոքր-ինչ խնդրի առաջ ենք կանգնած, բայց մենք նկատում ենք դրական աճ այս առումով, խնդիրն առանց լուծում չի մնա»,- եզրափակեց Ռևազյանը: