«Մարս Ավիա»-ն ևս կփակվի․ Ռևազյանն Աֆրիկայում եղած միջադեպի մասին

«Մենք լուրջ միջադեպեր ենք ունեցել Աֆրիկայում և քայլեր ենք արել, որ արտահերթ ստուգումներ կազմակերպենք Հայաստանում գրանցված, սակայն Աֆրիկայում թռիչքներ իրականացնող ավիաընկերություններում»,-լրագրողների հետ հարցուպատասխանի ընթացքում ասաց Քաղավիացիայի կոմիտեի նախագահ Տաթևիկ Ռևազյանը: Նրա տեղեկացմամբ հենց այդ ստուգումների արդյունքում կասեցվեց, և հետո փակվեց «Տարոն-Ավիա» ընկերությունը, հիմա էլ կասեցված են «Մարս Ավիա»-ի աշխատանքները, և, եթե հայտնաբերված թերությունները չշտկվեն, այդ ընկերությունն էլ կփակվի մայիսի մեկին: Դա կնշանակի, որ մենք այլևս չենք ունենա ավիաընկերություն, որը թռիչքներ է իրականացնելու Աֆրիկայում: «Սրանք լուրջ քայլեր են, որոնք արվում են կոմիտեի աշխատանքը բարեփոխելու համար, որովհետև իրենց թերացումների պատճառով մենք կանգնում ենք խնդիրների առաջ: Այդ լուրջ որոշումների հարցում մեզ օգնում են արտասահմանից ներգրաված գործընկերները, ովքեր ուղղորդում են՝ ինչպես իրականացնել տեսչական ավելի արդյունավետ ստուգումներ»: Կոմիտեի նախագահը, որպես կարևոր բացթողում, նշում է նաև ոչ լիարժեք համագործակցությունը արտասահմանյան քաղավիացիաների հետ: «Ուսումնասիրեցինք, հասկացանք, որ խնդիր է նաև, որ մենք՝ որպես կոմիտե, երբեք չենք ունեցել ուղիղ կապ տարբեր պետությունների քաղավիացինաերի հետ: Մենք միշտ կախված ենք եղել, որ իրենք կազմակերպեն այցեր, եթե տեսչական ստուգում է եղել: Մենք չենք կարողացել իրականացնել հարյուրտոկոսանոց անկախ ստուգումներ: Հիմա սկսել ենք ակտիվ համագործակցել, այս խնդիրը ևս լուծման ճանապարհին է»: