100.000 դրամ տուգանք չաշխատող մարդկա՞նց. չեմ վճարելու

Հասարակություն 22 Ապրիլ, 2020 16:22

«100.000 դրամ տուգանում են այն դեպքում, երբ մարդիկ անաշխատանք ու առանց գումարի նստած են տանը»: Տեղաշարժման թերթիկ չունենալու պատճառով տուգանված հերթական քաղաքացին է, դժգոհում է տուգանքի՝ սահմանված բարձր արժեքից, և պնդում, որ մարդկանց սոցիալական վիճակը թույլ չի տալիս այդքան բարձր գին վճարել թղթի կտորի համար: «Հայրս տնից դուրս է եկել շատ արագ, նա հիվանդանոց է գնացել՝ տեսակցության նպատակով, շտապելու պատճառով մոռացել է լրացնել տեղաշարժման թերթիկը: Մինչ այդ՝ ոչ մի օր տնից դուրս չի եկել, կարծում եմ՝ նաև դա է եղել առանց թերթիկի տնից դուրս գալու պատճառը, մտքով այդ պահին չի անցել»,-ասում է երիտասարդ դերասան Մայիս Համբարձումյանը: Քաղաքացու ընտանիքի անդամները, արտակարգ դրությամբ պայմանավորված, չեն աշխատում արդեն երկու ամիս, նա ինքը՝ չգրանցված աշխատող է, նկարահանվում է ֆիլմերում, որոնք 1-2 ամսով են ապահովում կայուն եկամուտ։ Իսկ թատրոններում մեկ ներկայացման համար վարձատրվում է 3000 դրամ։ «Տանն անչափաաս երեխա ունենք՝ եղբայրս, ով տասը տարեկան է, սակայն, մենք անգամ չենք կարողանում օգտվել սոցիալական աջակցության ծրագրերից, որովհետև դրանք հասանելի չեն հարյուրավոր ընտանիքների: Հիմա ինձ ասեք՝ ինչպե՞ս վճարեմ այդ գումարը»: Տարբեր դրույթներով պայմանավորված՝ սոցիալական ծրագրերն, իսկապես, հասանելի չեն բազմաթիվ ընտանիքների: Հարյուրավոր մարդիկ նույն բողոքով ամեն օր հանդես են գալիս սոցիալական ցանցերում: Ընդդիմադիր ուժերը ևս բարձրաձայնում են խնդրի մասին: Սրան զուգահեռ՝ բազմաթիվ բողոքներ կան տուգանքների վերաբերյալ, .այնուամենայնիվ, կառավարությունը պնդում է՝ նախապես զգուշացրել ենք, ամեն ինչ արվում է օրենքին համապատասխան, իսկ սոցիալական աջակցության ծրագրերը դեռ ավելանում են և ներառում ավելի մեծ թվով շահառուների: Իսկ ընդդեմ կառավարության՝ Մայիսն ու այլ շատ քաղաքացիներ չեն պատրաստվում վճարել տուգանքի այդ բարձր գինը: Ես, իսկապես, չեմ պատրաստվում մուծել նման աստղաբաշխական թվերը, հետո էլ նստեմ մատս բերանումս մտածեմ, թե հաց ոնց եմ առնելու կամ մինչև մայիսի 14-ը Աստված կանչելով ապրենք, որ ամեն ինչ վերանա, որ բոլորս աշխատենք և էլի ծերը ծերին հասցնենք: Հետո էլ նստենք հեռուստացույցի առաջ ու լսենք նախկին իշխանությունների կերած ու պահած MILLION's պատմությունը»։