«Իմ քայլ»-ը հանդիպում է ՍԴ դատավորի թեկնածու Էդգար Շաթիրյանի հետ

ԱԺ «Իմ քայլ»-ը  խմբակցությունն ասյօր` օգոստոսի 22-ին,  հանդիպում է Էդգար Շաթիրյանի հետ, որը լինելու է Սահմանադրական դատարանի դատավորի թեկնածուն՝ կառավարության առաջարկով:

«Ժողովուրդ»  օրաթերթին հետաքրքիր մանրամասներ են հայտնի դարձել նրա առաջադրման հետ կապված: Կառավարությունը մինչ Վահրամ Ավետիսյանին այդ պաշտոնում առաջարկելը դիտարկել է հենց Էդգար Շաթիրյանի թեկնածությունը՝ ցանկանալով հենց նրան էլ ի սկզբանե առաջադրել այդ պաշտոնում, սակայն վերջինիս խանգարել է տարիքը, քանի որ միայն օգոստոսի 18-ին նա դարձավ 40 տարեկան, որը, «ՀՀ Սահմանադրական դատարանի մասին» օրենքի չորրորդ հոդվածի համաձայն, պարտադիր պայման է Սահմանադրական դատարանի դատավոր լինելու համար: Եվ, ահա, միայն հիմա, երբ Վահրամ Ավետիսյանը դուրս եկավ պայքարից, և Շաթիրյանն էլ դարձավ 40 տարեկան, հնարավոր եղավ նրան առաջադրել այդ պաշտոնում: 

Շաթիրյանն անցած տարի կարճ ժամանակով եղավ կոռուպցիայի կանխարգելման հանձնաժողովի անդամ, բայց երբ քաղաքական կոմպրոմիսի արդյունքում որոշվեց հանձնաժողովի նախագահ նշանակել ԼՀԿ քվոտայով հանձնաժողով գործուղված Հայկուհի Հարությունյանին, Շաթիրյանը հրաժարական տվեց։ Լուրեր տարածվեցին, թե նա նեղացել է թիմից

Էդգար Շաթիրյանը Իրավաբանասկան գիտությունների թեկնածու է, դոցենտ, նա ԵՊՀ իրավագիտության ֆակուլտետի Սահմանադրական իրավունքի ամբիոնի դասախոս է:

Նշենք, որ ՍԴ դատավորի նախկին թեկնածու Վահրամ Ավետիսյանը «Իմ քայլ»-ի հետ հանդիպումից հետո դիմեց ԱԺ նախագահին հետ վերցնելու իր ՍԴ դատավորի թեկնածու լինելու մասին համաձայնությունը:

Եւ որպես այդ քայլի բացատրություն Ավետիսյանը իր ֆեյսբուքյան էջում գրել էր. ««Իմ քայլը» խմբակցության պատգամավորների հետ հանդիպումից և հետագա քննարկումներից ինձ համար ակնհայտ դարձավ, որ պատգամավորների մի մասի՝ Սահմանադրական դատարանի դերակատարության, Սահմանադրական դատարանի դատավորի ապաքաղաքականացվածության և անկախության վերաբերյալ մոտեցումներն ու պատկերացումներն իմ մոտեցումներին և պատկերացումներին համահունչ չեն, իսկ որոշ դեպքերում նաև ինձ համար անընդունելի»:

Նշենք, որ օգոստոսի 26-ը ՍԴ կազմը ձևավորելու վերջնաժամկետն է: