«Սա քրեական գործ է. ԵՊՀ ՀԽ նախկին նախագահը պետք է պատասխան տա»․ խոսնակ

«Երբ առավոտյան եկա աշխատանքի անվտանգության աշխատակիցները ինձ ասացին, որ ԵՊՀ հոգաբարձուների խորհրդի նակին նախագահը՝ Գևորգ Մուրադյանը, հրահանգ է տվել անվտանգության ծառայությանը, որ լրագրողներին թույլ չտան մուտք գործել ներս: Ես հարցրեցի, թե ինչպես է դա եղել, ինձ ասացին, որ, ըստ Գևորգ Մուրադյանի, պարետի որոշմամբ չի թույլատրվում 40 հոգուց ավելի մարդկանց փակ տարածքում հավաքվելը: Այսինքն՝ ի սկզբանե, արգելվել է լրագրողների մուտքը: Գևորգ Մուադյանը դահլիճում ասաց, որ լրագրողները, իբր, կարող են շենք մտնել, բայց դուք էլ տեսաք, որ շենք մտնելու հնարավորություն չկար: Կարծում եմ՝ սա քրեական գործ է, որովհետև լրագրողների  գործին խոչընդոտելը քրեական հոդված է: Ինքը բնականաբար չի վերցնի իր վրա այդ պատասխանատվությունը. ես ենթադրում եմ, որ այս որոշումը մնալու է ԵՊՀ-ի պատմության հերթական փակ դռների պատմությունը»,-  այս մասին լրագրողների հետ զրույցում ասաց ԵՊՀ խոսնակ Գևորգ Էմին-Տերյանը:

Ըստ նրա՝ կատարվածի համար պետք է պատասխան տան ԵՊՀ ռեկտորի ժամանակավոր պաշտոնակատարը և Գևորգ Մուրադյանը, որը, ինչպես նշեց խոսնակը, իրավասություն չուներ նման հրահանգ տալու. «Նիստը, որ սկսվեց, սկզբի հարցը այն էր, թե ով է նամակ ուղարկել խորհրդի անդամներին, որովհետև նամակը չուներ հասցեատեր: Նիստի ժամանակ Գևորգ Մուրադյանը նշեց, որ նամակի հեղինակը ինքն է եղել, որի լիազորությունները, իհարկե, չուներ»,- նշեց նա:

«Հանրային բուհը պետք է լինի հնարավորինս բաց, իմ աշխատանքի թիվ մեկ պարտավորությունն այն է, որ հասարակությունը հնարավորինս լավ տեղյակ լինի բուհի ներսում կատարվող գործընթացներից: Ես դեմ եմ այն ամենին, ինչ տեղի ունեցավ. էսպիսի բան չպիտի արվեր»,- ասաց ԵՊՀ խոսնակը: