Իմ թոռներն այս տարի դպրոց չեն գնալու, ես նրանցից կապիկ չեմ կերտելու․ Սերժ Սրապիոնյան

Էս խավարամիտ հերոսը, որ կարծում է, թե, Պաուլո Կոելիոյից վերցրած միտքը արտասանելով, օրիգինալ է երևում, խորապես սխալվում է։ Այս մասին այսօր ԿԳՄՍՆ -ի դեմ բողոքի ակցիայի ժամանակ լրագրողների հետ զրույցում ասաց ԵՊՀ բանասիրության ֆակուլտետի դասախոս Սերժ Սրապիոնյանը։

«Ինքը իր կաբինետում ավելի վստահ է զգում, քան որ դորս գա և զրուցի մարդկանց հետ, որոնց համար նա ռեֆորմներ է նախատեսել։ Եթե այդ ռեֆորմները ինձ համար է պատրաստել, ապա նա պետք դուրս գա և խոսի ինձ հետ, որովհետև ես Արայիկ Հարությունյանի անցած ճանապարհի քառակի ճանապարհն եմ անցել։ Եթե Արայիկ Հարությունյանն այդքանը չի հասկանում՝ ես հայտարարում եմ չհասկացողների համար՝ Հայաստանում երեք դպրոց կա կարելի է գնալ այնտեղ վերապատրաստվելու»,-ասաց Սրապիոնյանը։

Հարցին՝ ի՞նչն է պատճառը, որ նախարարը երկխոսության մեջ չի մտնում մասնագետների հետ, Սրապիոնյանը պատասխանեց․ «Ես կարծում եմ վախն է, իր արածի նեգատիվ իրողությունները հասկանալու զարմանալի կարողությունն է։ Ոչ ոք ավելի լավ, քան Արայիկ Հարությունյանը չի պատկերացնում, թե դպրոցական գրեթե 100-ամյա անընդհատ կատարելագործվող, բացթողումներ ունեցող երբեմն կատարելության հասնող այս համակարգը ինչպես կարելի է քանդել։ Նա, այդ տեխնոլոգիան իմանալով, քանդում է սուսուփուս, քանդում է առանց ավելորդ աղմուկի»։

Դիտարկմանը, թե այդ դեպքում ի՞նչ պետք է անել, Սրապիոնյանը նշեց, որ պետք է չնահազանդվել։

«Ես երկու թոռներ ունեմ, որոնք սովորում են միջին դպրոցում։ Իմ թոռներն այս տարի դպրոց չեն գնալու, ես իմ թոռներից կապիկ չեմ կերտելու, ես նրանցից կերտելու եմ հայ մարդ»,-ասաց Սրապիոնյանը։

Հարցին, թե հնարավո՞ր է Արայիկ Հարությունյանը հրաժարական տա, Սրապիոնյանն ասաց, որ նա երբեք հրաժարական չի տա, քանի որ նա չի լսում ժողովրդին։ 

Նշենք, որ ԿԳՄՍՆ-ի դիմաց հավաքվել են քաղաքացիներ, որոնք պահանջում են ԿԳՄՍ նախարար Արայիկ Հարությունյանի հրաժարականը։

Նրանք վանկարվում են՝ «Արայիկ, հեռացիր»։