Ովքեր են ամենաքննադատվող ՔՊ-ական պաշտոնյաները

Հեղափոխությունից անմիջապես հետո շատ կարճ ժամանակում նորաթուխ իշխանավորները դարձան այն պաշտոնյաները, որոնց հետ հանրությունը փոփոխությունների իրական հույսեր էր կապում: Հեղափոխական թիմի անդամները ասոցացվում էին փոփոխությունների, նոր քաղաքական գծի, հնի և հին քաղաքական ավանդույթների մերժման հետ: Հեղափոխությունից անցել է ընդամենը երկու տարի, սակայն արդեն իսկ կարող ենք փաստել, որ երկու տարի առաջվա օրվա հերոսները այսօր հակահերոսի դերում են՝ լինելով հանրության ամեն լուրջ և խորքային քննադատության թիրախում: Դիցուք՝ ներկայացնենք իշխանության ամենաշատ քննադատվող դեմքերի 5-յակը: 

Առաջին տեղում, իհարկե, առողջապահության նախարար Արսեն Թորոսյանն է: Վերջինս նշանակվելու օրից սկսած համարվում էր գործող իշխանությունների ամենաառաջադեմ անդամներից մեկը, նրա պատվին անգամ ֆան ակումբ էր գործում ֆեյսբուք սոցիալական ցանցում, Թորոսյանին էլ հեղափոխականները անվանում էին մեր «սրտի նախարար»: Խոսվում էր անգամ այն մասին, որ Թորոսյանի վարկանիշը ավելի բարձր է, քան վարչապետ Փաշինյանինը: Անցել է երկու տարի, և այսօր Արսեն Թորոսյանը այն պաշտոնյան է, ում հրաժարականը, կարծես թե, օրերի հարց է, և այդ պահանջը առաջ է քաշում հանրության գերակշիռ մասը: Պատճառն էլ համակարգում տիրող կոռուպցիան է, ԽԾԲ-ն և հովանավորչությունը և, իհարկե, ամենագլխավորը՝ կորոնավիրուսի համավարակի դեմ պայքարի տոտալ տապալումն էր, ինչը 1000-ից ավել մարդու կյանք է արժեցել: 

Երկրորդ տեղում ԿԳՄՍ նախարար Արայիկ Հարությունյանն է: Վերջինս Փաշինյանի հետ Գյումրիից Երևան քայլող փոքրաթիվ պաշտոնյաների շարքում էր՝ հեղափոխության առաջամարտիկներից մեկը: Այսօր Հարությունյանի հրաժարականը չի պահանջում միայն ալարկոտը: Պատճառները թերևս նույնն են՝ ոլորտային լրջագույն տապալումները՝ դպրոցներում սեռական դաստիարակության դասաժամեր ներդնելուց մինչև պատմության դասագրքերի չափորոշիչների փոփոխություն, ԲՈՒՀ-ից Հայոց պատմություն առարկայի, իսկ դպրոցներից՝ Հայ եկեղեցու պատմություն առարկայի դուրսբերումը: 

Երրորդ տեղում է Երևանի քաղաքապետ Հայկ Մարությանը: Մարությանի հետ երևանցիները առանձնհատուկ հույսեր էին կապում, նա հայտնի և հրապարակային դեմքերից թերևս առաջինն էր, ով միացավ Նիկոլ Փաշինյանին հեղափոխության հրապարակում՝ իր աջակցությունը հայտնելով իշխանափոխության շարժմանը: Այնուհետև Մարությանը դարձավ Երևանի քաղաքապետ՝ հավաքելով 80 տոկոս ձայն և տալով բազմաթիվ հեղափոխական խոստումներ: Արդյունքում` այսօր հասարակության մի ստվար զանգված, այդ թվում` նրան քվե տվողները, պահանջում են վերջինիս հրաժարականը: Մարությանը ոչ միայն չի կատարել իր խոստումները, այլ նաև հաջողացրել է 0-ի հասցնել իր երբեմնի բարձր վարկանիշը քաղաքապետարանում տիրող կոռուպցիայով, օլիգարխներից շինթույլտվություն տալու դիմաց ստացված Կամազներով, կոռուպցիայի կանխարգելման հանձնաժողովում հայտնվելով: 

Չորրորդ տեղում է նախկինում Կոտայքի մարզպետ, այսօր արդեն շրջակա միջավայրի նախարար Ռոմանոս Պետրոսյանը, ով նույնպես ժամանակին համարվում էր հեղափոխության սիմվոլներից մեկը: Կոտայքի մարզպետ նշանակվելիս նա հայտարարում էր, որ հեղափոխությունը տանում է մարզ, սակայն ակնհայտ է, որ Պետրոսյանը այս հարցում որևէ հաջողություն չգրանցեց` արժանանալով քննադատությունների անգամ իր իսկ թիմակիցների կողմից: Միակ բանը, ինչով աչքի ընկավ Ռոմանոս Պետրոսյանը, դա քաղաքական ինտրիգներ հյուսելը և տարբեր քաղաքական ռազբորկաների մեջ հայտնվելն էր: 

Հինգերորդ տեղում է Արարատի մարզպետ Գարիկ Սարգսյանը: Սարգսյանը հեղափոխության իսկական սիմվոլն էր. առաջին գյուղապետը, իսկ փաստացի առաջին գործող պաշտոնյան, ով միացավ հեղափոխությանը: Իհարկե, Սարգսյանը այլ կերպ չէր էլ կարող վարվել, չէ՞ որ նա ներկայացնում էր ՔՊ-ն, սակայն հեղափոխական ամբիոններում Գարիկ Սարգսյանին հերոսացնում էին բոլոր հնարավոր և անհնարին միջոցներով՝ հորդորելով բոլոր պաշտոնյաներին հետևել նրա օրինակին: Այսօր Գարիկ Սարգսյանը նոր իշխանությունների ամենասկանդալային դեմքերից մեկն է: Մարզպետը ոչ միայն չի տարբերում թռչունը երկկենցաղից, 40 հազար հեկտարը՝ 40 հեկտարից, այլ նաև աշխատանքով է ապահովել իր բոլոր բարեկամներին և ընկերներին, հայտնվել է բազմաթիվ դատական գործընթացների մեջ, քանի որ քաղաքացիները, իրար հերթ չզիջելով, բողոքարկում էին մարզպետի ապօրինի, երբեմն էլ զավեշտի հասնող որոշումները: Իրականում, տպավորություն է, որ եթե Գարիկ Սարգսյանը լիներ մարզպետ նախորդ իշխանությունների օրոք` ընդդիմադիր Փաշինյանը կպահանջեր ոչ միայն ազատել վերջինիս աշխատանքից, այլ նաև կալանավորել.. 

Այս թեմայով Հայաստանի իշխանությունները մեզ առաջարկում են անասունի վարքագիծ. Գեղամ Ստեփանյան Կաթվածահար իշխանություններ. երբ վնաս տալուց բացի ուրիշ ոչնչի ունակ չեն. «Փաստ» Մահը բոլորիցս խլեց նվիրյալ զինակցին և պայքարի գաղափարական ընկերոջը. «Հայաստան» խմբակցություն Արդյո՞ք ՀՀ-ն պետք է դուրս գա ԵԱՏՄ-ից՝ հաշվի առնելով, որ ԵՄ-ն առաջին հերթին մաքսային միություն է. ԱԺ «Հայաստան» խմբակցություն Տարածքներ հանձնելը պետության դեմ ծանրագույն  հանցագործություններ են․ «Հայաստան» խմբակցություն