Միլիոնների արտոնություններ՝ «մերժվածներին». ում բիզնեսին է «լավ աչքով» նայում հեղափոխական կառավարությունը

Ուղիղ մեկ տարի առաջ վարչապետ Նիկոլ Փաշինյանը, հարցազրույց տալով գերմանական Die Zeit պարբերականին, հայտարարել էր հետևյալը. «Ես ընտրողներին բացատրել եմ, որ մենք Հայաստանում այլևս օլիգարխներ չունենք: Դա շատերին զարմացնում է, քանի որ այդ մարդիկ դեռ տեղում են, և նրանք նույնպես չպետք է գնան: Բայց ի՞նչ է օլիգարխը: Օլիգարխն օգտվում է արտոնություններից: Նրա համար կան այլ օրենքներ, նա ազդեցություն ունի կառավարության վրա: Այսօր բոլորի համար պայմանները նույնն են»: Պնդումը, որ Հայաստանում չկան այլևս օլիգարխներ, այն էլ այնպիսի համատեքստում, ինչպիսին որ ներկայացնում է Փաշինյանը, չի կարելի ընդունել միանշանակ: Բանն այն է, որ կառավարության կողմից այս ամիսների ընթացքում միլիարդների արտոնություն է տրվել հենց այն գործարարներին, որոնց Փաշինյանը ժամանակին անվանել է օլիգարխ, նախորդ իշխանության ֆինանսական կտուր: Ավելին՝ ժամանակին ինքը` ընդդիմադիր Փաշինյանը, Սերժ Սարգսյանին մեղադրում էր մերձավորներին պետական արտոնություններ տրամադրելու մեջ` հայտարարելով, որ ՓՄՁ-ը և նոր բացված, սակայն թիկունք չունեցող բիզնեսները չեն արժանանում կառավարության ուշադրությանը: Այսօր մենք տեսնում ենք, որ արդեն Նիկոլ Փաշինյանի կառավարությունը միլիոնների արտոնություն է շնորհում նույն օլիգարխներին, գործարարներին, կամ նախկին իշխանության հետ առնչություն ունեցող անձանց: 

Դիցուք՝ կառավարությունը Սամվել Ալեքսանյանին պատկանող «Ալեքս տեքստիլ» ընկերությանը 1 միլիարդ 177 միլիոն դրամի մաքսատուրքից ազատման արտոնություն է տվել։ 

 ԱԺ նախկին պատգամավոր Գարեգին Նուշիկյանի «Պարկ Գրուպ» ընկերությանը միանգամից երկու արտոնություն է տրվել։ Գործադիրի մի արտոնությամբ ընկերությունը Հայաստան կներմուծի ապրանքներ՝ ավելացված արժեքի հարկի գումարները երեք տարի անց վճարելով, իսկ մյուս արտոնությամբ՝ ներմուծվող ապրանքները կազատվեն ներմուծման մաքսատուրքից։ Մաքսատուրքից ազատման արտոնությունը կազմելու է մոտ 375 միլիոն դրամ, իսկ հետաձգվող ԱԱՀ-ն գնահատվել է 980 միլիոն դրամ։ 

 Մայիսի 23-ի նիստում 27 միլիոն դրամի հարկային արտոնություն տրվեց նախկին ՀՀԿ-ական Աշոտ Արսենյանին պատկանող «Ջերմուկ Գրուպ» ընկերությանը։ Գործադիրը բավարարեց ընկերության ներկայացրած հայտը՝ գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և (կամ) նյութերը ներմուծման մաքսատուրքից ազատելու արտոնությունից օգտվելու համար և սահմանված կարգով կիրառեց համապատասխան արտոնությունը։ Ըստ նախագծի հիմնավորման՝ այս արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, տեղական արտադրության և արտահանման խթանման համար: 

28.5 մլն դրամի արտոնություն է տրվել «Գրին Ֆարմեր» ընկերությանը, որը պատկանում է ՊԵԿ նախկին նախագահ Վարդան Հարությունյանի որդիներին: 

20 միլիոն դրամի արտոնության է արժանացել նաև հենց նույն Փաշինյանի կողմից Վատիկանում նախկին դեսպան Միքայել Մինասյանի հետ կապվող «Սպայկա» ընկերությունը: 

Նախկին պատգամավոր Մելիք Մանուկյանին պատկանող ընկերությունը կառավարության կողմից 26 միլիոն դրամի արտոնություն է ստացել: «Մանուկյան կոնյակի գործարան» ընկերությունը Իտալիայից Հայաստան կներմուծի սարքավորումներ՝ մաքսատուրքի վճարներից ազատվելով: 

Մեկ այլ նիստի ժամանակ էլ ընդունվեց ներդրումային ծրագրի շրջանակներում «ՎԱԲԱ» ընկերությանը մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը երեք տարով հետաձգելու մասին նախագիծը: «ՎԱԲԱ»-ն պատկանում է ՀՀԿ-ական Վահրամ Բաղդասարյանին: 

Մեկ այլ որոշմամբ կառավարությունը 16.4 միլիոն դրամի արտոնություն Է տրամադրել «ՍԻԼ-ՄԱԱԶԱ» սահմանափակ պատասխանատվությամբ ընկերությանը: Նշենք, որ «Սիլ-մաազա» ընկերությունը «ՍԻԼ ԿՈՆՑԵՌՆ»-ի ընկերությունների խմբի մաս է կազմում։ Իսկ Խաչատուր Սուքիասյանը «ՍԻԼ Կոնցեռն» ՍՊԸ-ի հիմնադիրն է: 

«ՍԱՀԼԵՎՍ» ՍՊԸ-ին կառավարությունը նույնպես ազատել է մաքսատուրքից` տալով 14 միլիոն դրամի արտոնություն: Այն պատկանում է ՀՀԿ-ական Նաիրա Կարապետյանին: 

Փաստենք, որ Նոր Հայաստանում որևէ այլ՝ նոր բացված բիզնես չի արժանացել այս մակարդակի պետական աջակցության` ի դեմս միլիոնների հասնող արտոնությունների: Ստացվում է` Փաշինյանի կառավարությունը նույն ջանասիրությամբ, ինչ նախորդ իշխանությունները, լծված է գործարար օլիգարխների բիզնեսը ծաղկացնելու սուրբ գործին և, մոռանալով իր ընդդիմադիր ժամանակ արված հայտարարությունները, այսօր արդեն ինքն է լավ աչքով նայում մերժվածների բիզնեսներին…