Ինչպես կրկնվեց «մերժվածների» ամենամեծ սխալը

Վերջին օրերին տպավորություն է ստեղծվում, որ իմքայլական պաշտոնյաները կտրվել են իրականությունից և չեն ցանկանում առերեսվել իրականության հետ, իրականություն, որն իրենց համար գուցե և տհաճ ու անցանկալի է, սակայն փաստ է: Խոսքը վարչապետ Փաշինյանի հրաժարականի պահանջի և այդ պահանջը ներկայացնող հասարակության մի ստվար հատվածին՝ ժողովուրդ չհամարելու և վարչապետին աջակցության կեղծ իմիտացիա ստեղծելու ցանկության մասին է: 

Դիցուք՝ այսօր Լոռու նորանշնակ մարզպետ Արմեն Խաչատրյանը հայտարարել է, որ վարչապետի հրաժարականը պահանջում են ընդամենը 500 քաղաքացի: Սա այն դեպքում, երբ միայն իր մարզից տասնյակ համայնքներ են հանդես եկել Նիկոլ Փաշինյանի հրաժարականի կոչով: 

«Իմ քայլից» պատգամավոր Մարիա Կարապետյանը նույնպես վստահ է, որ Փաշինյանը հրաժարական չի տալու, քանի որ հանրության վստահության աստիճանը մեծ է: Հաշվի առնելով տիկին Կարապետյանի սերը Նովրուզի հանդեմ` այս դեպքում պետք է հստակ ճշտել, թե որ երկրի հասարակության վստահության մասին է խոսքը: 

Իմքայլական պատգամավոր Հովհաննես Իգիթյանը խելացի դեմքով հայտարարում է. «Պուտինն էլ է այդ փասթաթուղթը ստորագրել, Պուտինի հրաժարականն էլ պահանջենք՞»: Պարոն Իգիթյանին, թերևս, կարիք կա բացատրելու, որ Պուտինի հրաժարականը հայ ժողովուրդը չի պահանջելու այն պատճառով, որ այդ Պուտինը չէր երկու տարի բանակցությունները սեփական կետից մտցնում փակուղի: 

Պատգամավոր Հայկ Գևորգյանը հայտարարում է, որ եթե մենք կարողանանք մեր ապրանքները վաճառել Ադրբեջանում` դրա մեջ ոչ մի վատ բան չկա, հրաժարականի պահանջ էլ չկա հանրային, քանի որ հասարակության մեծ մասը գիտակցում է` ինչ է արվել և ինչի համար: 

Արփի Դավոյան անունով պատգամավորը, ով վերջերս անչափ սրտնեղել էր ԱԺ կոտրած բռնակների պատճառով, հպարտորեն հայտարարում է, որ ոչ մեկ հող չի հանձնել: Վերջերս համացանցում հայտնված Լուկաշենկո-Սարգսյան զրույցը, կարծես, հաստատում է, որ առնվազն այս հարցում տիկին պատգամավորը անկեղծ է: Չեն հանձնել, այլ գնացել են առ ու ծախի:

Պատգամավոր Բաբկեն Թունյանն էլ գտնում է, որ շատ սխալներ են արել, բայց դրանք այն աստիճանի չէին և այնպիսի ոլորտներում չէին, որ կառավարությունը հրաժարական տա: 

Լենա Նազարյանը նույնպես շարունակում է փայլել իր մտքի գոհարներով: Վերջինիս՝ «Եռակողմ հայտարարությունը հնարավոր է եղել ստանալ այն կետում, որում հնարավոր է եղել» արտահայտությունը դեռ երկար կուսումնասիրվի լեզվաբանների կողմից, դեռևս երկար փորձեր կկատարվեն վերծանելու այս շեդեվրալ միտքը, որի իմաստը հասկացել է, թերևս, միայն տիկին Նազարյանը: 

Պատգամավոր Անդրանիկ Քոչարյանը գտնում է, որ իշխանությունը ունի լեգիտիմության բարձր աստիճան: 

Ինչպես տեսնում ենք՝ ՔՊ-ականները պարզապես կրկնում են 2018 թվականի՝ ՀՀԿ-ականների դասական սխալները, ովքեր հեղափոխության առաջին օրերին հայտարարում էին, որ Սերժ Սարգսյանի հրաժարականի որևէ հիմք չկա, որ ժողովրդի մեծ մասը շարունակում է վստահել ընտրված քաղաքական ուժին: Ինքը` Սերժ Սարգսյանն էլ հայտարարում էր, որ ժողովրդի անունից 7-8 տոկոս տարած խմբակցությունը իրավունք չունի խոսելու: Ինչպես ասում են՝ գտեք 10 տարբերություն…