Գերմանիայում COVID-19-ի դեմ պատվաստումներից հրաժարվելու պատճառով 7 աշխատակից հեռացվել է աշխատանքից․ Bild

Հաշմանդամների և տարեցների խնամքի գերմանական կազմակերպություններից մեկի ղեկավարը աշխատանքից հեռացրել է յոթ աշխատակցի ՝ կորոնավիրուսի դեմ պատվաստումներից հրաժարվելու համար: Այս մասին հաղորդում է Bild թերթը: Ըստ թերթի՝ սա կորոնավիրուսային վարակի դեմ պատվաստումներից հրաժարվելու պատճառով աշխատողների աշխատանքից հեռացման առաջին դեպքն է՝ չնայած այն հանգամանքին, որ Գերմանիայում պատվաստումը կամավոր է: Աշխատակիցներին աշխատանքից հեռացնելուց հետո Դեսաու-Ռոսլաու քաղաքում խնամատար ընկերության ղեկավար Ռենե Վիլմերը սկսել է մահվան սպառնալիքներ ստանալ պատվաստումների հակառակորդներից, նշում է թերթը: Վիլմերը պահանջել է, որ պատվաստանյութը հասնելուն պես իր աշխատակիցները պատվաստվեն կորոնավիրուսի դեմ: Հաշմանդամների և տարեցների խնամքի աշխատողները Գերմանիայի Դաշնային Հանրապետության քաղաքացիների առաջին գերակա խմբում են, ովքեր դրա իրավունքն ունեն: Երեքը հրաժարվել են պատվաստվել, ևս չորսը չեն կարողացել որոշում կայացնել: Ընկերության ղեկավարը երկու օր ժամանակ է տվել որոշում կայացնելու համար, բայց աշխատակիցները այդպես էլ չեն պատվաստվել, ինչին հաջորդել է նրանց՝ աշխատանքից հեռացումը: «Ես ամեն ինչ անում եմ մեր հիվանդներին պաշտպանելու համար: Սա իմ բարոյական պարտականությունն է», - իր գործողությունները բացատրել է Վիլմերը: