Հ1-ը խուսափում է պարզաբանում տալ

Հանրային հեռուստաընկերությունը երեկ գրաքննության է ենթարկել և կրճատած  եթեր հեռարձակել ՀՀ Աժ հայտարարությունների ժամին պատգամավորների հնչեցրած հայտարարությունները և կառավարության հետ հարց ու պատասխանները: «Հայկական ժամանակ»-ը գրում է, որ հայտարարություններից եթեր չի հեռարձակվել Աժ «Հայ ազգային կոնգրես» խմբակցության անդամ  Նիկոլ Փաշինյանի հայտարարությունը և նույն խմբակցության պատգամավոր Հրանտ Բագրատյանի հարց ու պատասխանը:

Lurer.com-ը փորձեց այս ամենի վերաբերյալ պարզաբանում ստանալ Հանրային հեռուստատեսությունից։ Ընդհանուր բաժնից հեռախոսավարուհին մեզ պատասխանեց, որ կմիացնի օգնականին և վերջինս կպատասխանի մեր հարցին։ Օգնականն էլ նշեց, որ այս հարցով պատասխանատուն  ծրագրերի ղեկավար Մարատ Օրդյանն է։ Իսկ Մարատ Օրդյանը հայտարարեց, որ ինքը չէ պատասխանատուն, և, ի զարմանս մեր, զարմացավ, թե ինչու ենք զանգահարել իրեն։ Մենք նորից զանգահարեցինք ընդհանուր բաժին և կրկին փորձեցինք տեղեկություն ստանալ հեռախոսավարուհուց։ Նա ևս զարմացավ Օրդյանի այն խոսքից, թե նա չէ պատասխանատուն։ Հեռախոսավարուհին, որի անունն իմանալու մեր խնդրանքն այդպես էլ չբավարարվեց վերջինիս կողմից, նաև ավելացրեց, որ ինքն այլ պատասխանատուի չի կարող նշել։ 

Այսպիսով, այս ամենից կարող ենք եզրակացնել, որ կա՛մ Հանրային հեռուստատեսությունը խուսափում է պարզաբանում տալ այս ամենի կապակցությամբ, կա՛մ՝  Հ1-ում պաշտոնատար անձանց պատասխանատվության լուրջ խնդիր կա։ Հիշեցնենք, որ ՀՀ «Աժ կանոնակարգ» օրենքի 35-րդ հոդվածի 4-րղ կետը սահմանում է. «Հերթական նստաշրջանի չորսօրյա նիստերի յուրաքանչյուր չորեքշաբթի օրվա վերջին նիստում վարչապետը և կառավարության անդամները պատասխանում են պատգամավորների հարցերին: Նիստի տեսագրությունն ամբողջությամբ ցուցադրվում է հեռուստաընկերությամբ նույն օրը՝ պատգամավորների հայտարարությունների հեռարձակումից անմիջապես հետո»: