Ովքեր են Փաշինյանին հերքող և հակասող թիմակիցները
Վերլուծական
Նիկոլ Փաշինյանին հերքում են ոչ միայն ռուսական և արևմտյան ԶԼՄ-ները, պաշտոնյաները, այլ, որքան էլ տարօրինակ չհնչի, սեփական թիմակիցները: Ամեն բան սկսեց դեռ 2018 թվականին, երբ վարչապետի խորհրդական Արսեն Գասպարյանը երկու անգամ հերքեց Փաշինյանի՝ մինչ այդ արած հայտարարությունները: Սկզբում Գասպարյանը հայտարարել էր, որ գազի գնի իջեցման հիմք այդ պահին չկա, և այդ հայտարարությունն արվում էր Նիկոլ Փաշինյանի հավաստիացումների ֆոնին, որ Հայաստանի կառավարությունն անելու է ամեն ինչ՝ առնվազն սահմանից այս կողմ գազի սակագինը վերանայելու համար:
Հետո էլ Գասպարյանի խոսքերից պարզվեց՝ ներդրողները ընդհանրապես չեն սպասում արտահերթ ընտրությունների անցկացմանը և հերթ են կանգնել Հայաստանում ներդրում կատարելու համար: Գասպարյանի այս հայտարարությունը էլ ավելի զավեշտալի էր Նիկոլ Փաշինյանի արված հայտարարությունների ֆոնին: Բանն այն է, որ արտահերթ ընտրությունների անհապաղ անցկացումը վարչապետը պայմանավորում էր հենց ներդրողների ոտքը կախ գցելու հանքամանքով, բազմիցս հայտարարելով, որ միայն ընտրությունների անցկացումից հետո հնարավոր կլինի մտածել տնտեսության զարգացման մասին:
Փաշինյանի թիմակիցները հերքում են նրա խոսքերը նաև ընտրություններից հետո: Իշխանափոխությունից հետո պատերազմ հայտարարվեց ստվերային տնտեսությանը և անպարտաճանաչ հարկատուներին։ Պարզվում է՝ պատերազմն այնքան էլ լուրջ արդյունքներ չի տվել։ Եվ այդ մասին բացահայտ հայտնում են ՊԵԿ-ից` նշելով, որ միայն անցած տարի ՊԵԿ-ը շուրջ 8.5 մլրդ դրամի ստվերային շրջանառություն է բացահայտել: Այսինքն` հեղափոխությունից երեք տարի անց էլ ստվերային տնտեսության ծավալները շարունակում են սահմռկեցուցիչ մնալ, մինչդեռ Նիկոլ Փաշինյանը իր ասուլիսներում հայտարարում էր, որ ստվերի դեմ պայքարը հաջողել է: Սա միակ դեպքը չէ, երբ ՊԵԿ-ը հակասում է վարչապետի տված տեղեկություններին: Ըստ ՊԵԿ պաշտոնական թվերի՝ Հայաստանում աշխատատեղերի թիվը 2020 թվականի ապրիլին կրճատվել է՝ 620 հազարից դառնալով 547 հազար, Փաշինյանն այդ նույն ժամանակ ֆեյսբուքյան գրառումներ էր անում՝ ավետելով, որ Հայաստանում աշխատատեղերի կայուն աճ է գրանցվում:
Փաշինյանին հերքում է նաև սեփական էկոնոմիկայի նախարարը: Եթե Փաշինյանը պնդում է, որ տնտեսությունը առողջանում է, իսկ բիզնեսը պատշաճ աջակցություն ստանում պետությունից, ապա նախարարը իր հարցազրույցի ընթացքում հայտարարում է, որ բիզնեսի վիճակը Հայաստանում ծայր աստիճան վատ է: Երեկ էլ Փաշինյանի ներդրումային պոզիտիվ տրամադրությունները ցրեց էկոնոմիկայի փոխնախարարը, ով հայտարարեց, որ Հայաստանում ներդրումային վիճակը վատացել է:
Փաշինյանին հերքում է նաև ԱԳՆ նախարարը: Եթե վարչապետը պնդում էր, որ ԳՇ հայտնի հայտարարությունը ռազմական հեղաշրջման փորձ է, ապա ԱԳՆ ղեկավարը հայտարարում է, որ, ըստ իր կարծիքի, այդ հայտարարությունը չի կարելի դիտարկել իբրև ռազմական հեղաշրջման փորձ: ԱԳՆ-ն Փաշինյանին հերքել էր նաև պատերազմից անմիջապես հետո, երբ ի պատասխան վարչապետի պնդումների, որ Շուշին հանձնելու հարցը մշտապես բանակցությունների առարկա է եղել՝ ԱԳՆ խոսնակը հայտարարեց, որ այդ հարցը երբեք բանակցությունների ընթացքում չի շոշափվել:
Ամենադիտված 
Մնաս բարյավ. Րաֆֆի Հովհաննիսյան
