Նիկոլ Փաշինյանի նկատմամբ քրեական գո՞րծ կհարուցվի

Նիկոլ Փաշինյանի հրաժարականի շուրջ ստեղծված աղմուկը դեռ չի հանդարտվել: Սահմանադրագետները համակարծիք են, որ հրաժարականից հետո Նիկոլ Փաշինյանը չէր կարող շարունակել զբաղեցնել վարչապետի ԺՊ պաշտոնը և այդ պաշտոնը պետք է փոխանցվեր փոխվարչապետներից մեկին: Ուշագրավ է, որ ինքը` Փաշինյանն, էլ 2018-ին հեղափոխական ամբիոնից հայտարարում էր, որ Սերժ Սարգսյանի դեմ կարող է քրեական գործ հարուցվել, եթե վերջինս հրաժարականից հետո շարունակի մնալ վարչապետի ԺՊ: Կարծես թե, ինչ-որ բան է փոխվել, և այսօր Նիկոլ Փաշինյանն այդ քայլի մեջ որևէ քրեական տարր չի տեսնում:

Ընդհանրապես Սահմանադրության խախտումը իշխող քաղաքական ուժի համար դարձել է յուրահատուկ  նոու-հաու: Օրինակ` Նիկոլ Փաշինյանը Սահմանադրության խախտմամբ երկար ժամանակ չէր նշանակում նախարարների, այնուհետև կրկին օրենքի խախտմամբ յուրացնելով նախագահի լիազորությունները ի վերջո նշանակեց նրանց: Նիկոլ Փաշինյանը չուներ նաև ԳՇ պետին պաշտոնից ազատելու լիազորություն, սակայն գնաց այդ քայլին՝ բոլորին հայտնի և հասկանալի պատճառներով, փորձելով ձերբազատվել անհնազանդ գեներալիտետից: Ուշադրություն դարձնենք նաև այն հանգամանքի վրա, որ Նիկոլ Փաշինյանի հայտարարության համաձայն` 2021 թվականի հունիսի 20–ին տեղի կունենան արտահերթ խորհրդարանական ընտրություններ, ինչը մեկ այլ ապօրինության փաստացի դրսևորում է։ ՀՀ Սահմանադրության 93-րդ հոդվածով հստակ սահմանվում է, որ «Ազգային ժողովի հերթական և արտահերթ ընտրությունները նշանակում է Հանրապետության նախագահը», այսինքն` ՀՀ նախագահի սահմանադրական իրավասությունն ապօրինաբար յուրացվել է վարչապետի կողմից։

Ազգային ժողովի կողմից ընդունված` «Հայաստանի Հանրապետության քրեական դատավարության օրենսգրքում փոփոխություն և լրացում կատարելու մասին» Հայաստանի Հանրապետության օրենքի 1-ին հոդվածի 2-րդ կետը ՍԴ-ն ճանաչել է Սահմանադրության 61-րդ հոդվածի 1-ին մասին, 75, 78 և 79-րդ հոդվածներին հակասող:Ազգային ժողովի կողմից ընդունված` «Բանկային գաղտնիքի մասին ՀայաստանիՀանրապետության օրենքում լրացում կատարելու մասին ՀայաստանիՀանրապետության օրենքը ճանաչել է Սահմանադրության 61-րդ հոդվածի 1-ին մասին,75, 78 և 79-րդ հոդվածներին հակասող: Սահմանադրական դատարանը փետրվարի 18-ի հերթական նիստում Ոստիկանության օրենքի դրույթներից մեկը հակասահմանադրական էր ճանաչել։ Հանրապետության նախագահի դիմումի հիման վրա՝ «Սահմանադրական դատարանը հակասահմանադրական էր ճանաչել ՍԴ մասին» սահմանադրական օրենքի և «ԱԺ կանոնակարգ» սահմանադրական օրենքի որոշ դրույթները: Սահմանադրական դատարանը հակասահմանադրական էր ճանաչել նաև Քրեական դատավարության օրենսգրքի 143-րդ հոդվածի 1-ին և 6-րդ մասերը:  Վերը նշված բոլոր օրենքները խորհրդարանում առաջ են քաշվել «Իմ Քայլի» պատգամավորների կողմից, ընդունվել են մեծամասնության ջանքերով՝ բոլոր դեպքերում էլ ընդդիմությունը կամ դեմ է քվեարկել վերը նշված օրենքներին և օրենսրդական լրացումներին, կամ՝ ձեռնպահ: Ասել է թե՝ այս օրենքները, որոնք հետագայում հակասահմանադրական են ճանաչվել ամբողջությամբ, «Իմ Քայլի»  քաղաքական «ուղեբեռն» են:

Անգամ Մարտի 1-ի քրեական գործի հիմքում դրված հոդվածը վերջերս ճանաչվեց հակասահմանադրական և դատարանը ստիպված էր կասեցնել երկրորդ նախագահի քրեական հետապնդումը: Փաշինյանն, ըստ էության, չլուծեց նաև Քոչարյանին և մի շարք գեներալներին մեկուսացնելու խնդիրը, սակայն, մեկ անգամ ևս ցուցադրեց իր հավատարմությունը սահմանադրության նորմերի պահպանմանը; 

Այժմ հարց է առաջանում, արդյո՞ք Նիկոլ Փաշինյանը կենթարկվի քրեական հետապնդման մի բանի համար, ինչի համար իր իսկ խոսքերով դեռ երեք տարի առաջ քրեական հետապնդում էր հասնում երրորդ նախագահ Սերժ Սարգսյանին...