Համացանցում կեղծ լուրեր տարածող պաշտոնյաների թոփ 10-ը

Արցախյան 44-օրյա պատերազմից ի վեր չկա իրադարձությունների կանխատեսելիության որևէ աստիճան։ Կարող է ամեն պահի այնպիսի իրադարձություններ տեղի ունենան, որոնք նույնիսկ ամենավատ երազում չէինք կարող տեսնել։ Ու հարցն այն է, որ դառն իրականությունը ուղեկցվում է իրարամերժ տեղեկատվական հոսքերով, որի պարագայում հասարակ քաղաքացու համար շատ դժվար է կողմնորոշվել։ Եվ սա արդեն ոչ թե բացառություն, այլ կանոն է դարձել, որ իշխանություններն, իրենց գործելակերպին համապատասխան, մոլորեցնում են հասարակությանը։ «Իմ քայլը» խմբակցությունը նույնիսկ որոշել է օրենք ընդունել, որով կքրեականացվի համացանցում կեղծ լուրերի տարածումը: Ողջունելի է, իհարկե, սակայն դիցուք, թե քանի իշխանական պաշտոնյա է վերջին օրերին զբաղված եղել նրանով, ինչը իրենք իսկ պատրաստվում են քրեականացնել...

«Իմ քայլը» խմբակցության պատգամավոր Արթուր Հովհաննիսյանը սոցկայքի իր էջում հրապարակել էր մի գրառում, որում հերքում էր համացանցում տարածվող հայտնի տեսանյութի՝ Սյունիքում և Արմավիրում նկարահանված լինելու փաստը: Ավելի ուշ ՀՀ ՊՆ-ն հատատեց, որ դեպքերը տեղի են ունեցել հենց այդ հատվածներում, սակայն, պատգամավորն անգամ հարկ չհամարեց հերքել իր կողմից տարածված կեղծ լուրը:

«Իմ քայլի» մեկ այլ պատգամավոր՝ Վահագն Ալեքսանյանը, նույնպես պնդում էր, որ Հայաստանում կան ադրբեջանական շահեր սպասարկող ուժեր և հենց նրանք են տարածում նմանատիպ տեսանյութերը, որոնք, ըստ Ալեքսանյանի, իրականության հետ որևէ աղերս չունեին: Դրանից հետո Ալեքսանյանը ներողություն էր խնդրել կեղծ տեղեկություն տարածելու համար:

Իշխանական պատգամավոր Արփի Դավոյանը իր էջում գրել էր, որ ընդդիմադիր որոշ շրջանակներ համագործակցում են Ադրբեջանի հետ` փաստացի կրկնելով Նիկոլ Փաշինյանի՝ կառավարության նիստում հնչեցրած միտքը: Սա ուղղակի մեղադրանք է, որի միակ նպատակը հանրության շրջանում ընդդիմադիր ուժերի դեսկրիդիտացիան է:

ԱԺ «Իմ քայլը» խմբակցության պատգամավոր Նազելի Բաղդասարյանը, ով առաջիններից էր, որ հայտնեց, թե Բաքվից հայ ռազմագերիներ են վերադառնալու, սակայն նրանք այդպես էլ չեկան, ասում է՝ խնդրի վերաբերյալ կառավարության հնչեցրած կարծիքներին ավելացնելու որևէ բան չունի։ Սակայն, չի շտապում ներողություն խնդրել՝ կեղծ լուրեր տարածելու համար:

Պատգամավոր Արմեն Խաչատրյանը հայտարարում էր, որ Սյունիք ներխուժած ադրբեջանցիները պարզապես մոլորվել են, այն բանից հետո, երբ վարչապետ Փաշինյանն, ըստ էության, ադրբեջանցիների կողմից ՀՀ տարածքի օկուպացիան անվանեց կազմակերպված սադրանք, Խաչատրյանը հարկ չհամարեց հերքել իր իսկ կողմից տարածված ապատեղեկատվությունը:

Գեղարքունիքի մարզպետ Գնել Սանոսյանը հարցազրույցներում պնդում էր, որ ադրբեջանցիները մարզի տարածք չեն մտել, Սանոսյանի տարածած տեղեկությունը ժամեր անց հերքեց ՊՆ-ն:

Սյունիքի մարզպետ Մելիքսեթ Պողոսյանը հայտարարում էր, որ իրականությանը չեն համապատասխանում համացանցում տարածված այն տեղեկությունները, թե իբր ադրբեջանցիներն ամբողջությամբ զբաղեցրել են Սև լճի տարածքն ու ներթափանցել են Սյունիքի մարզ: Թե ինչպես ստացվեց, որ այնուհետև ԱԽ նիստում այդ իրականությանը չհամապատասխանող տեղեկությունը դարձավ պայթյունավտանգ իրավիճակ՝ Պողոսյանը, իհարկե, բացատրել չի կարող և, թերևս, չի էլ ցանկանում:

Պատերազմից հետո, մասնավորապես, Սյունիքի մարզում թշնամու հետ ձեւավորված նոր շփման գիծը, որի հետեւանքով վերջինիս վերահսկողության տակ անցան մինչ այդ ՀՀ Սյունիքի մարզի բնակավայրերի որոշ տարածքներ (ՀՀ կադաստրի կոմիտեի կողմից հաստատված իբրեւ ՀՀ տարածք), վարչապետ Նիկոլ Փաշինյանին դրդեց շրջանառության մեջ դնել մանիպուլյատիվ եւ նույնիսկ կեղծ թեզ, թե Ադրբեջանի հետ ՀՀ սահմանների նկարագրությունը տրվել է դեռեւս 2010 թ. ընդունված «Վարչատարածքային բաժանման մասին» օրենքով:Իրականությունն այն է, որ ՀՀ-ն 2010-ին Ադրբեջանի հետ պետական սահման չի որոշել կամ տեղորոշել:Վարչապետի կողմից շարունակ կրկնվող կեղծ պնդումները տիրաժավորվում են նրա կուսակիցների ու թիմի կողմից: Այն, ինչ ասում է Փաշինյանը, «ֆեյք նյուզի» դասական օրինակ է: «Ֆեյք նյուզին» բնորոշ երեւույթ է նաեւ կեղծ լուրի տիրաժավորումը:

«Իմ քայլի» պատգամավոր Հայկ Կոնջորյանը երկրորդ նախագահ Քոչարյանի թիմակիցներին մեղադրում էր Ադրբեջանին շահերը սպասարկելու մեջ` պնդելով, որ նրանց առջև հենց նման խնդիր է դրված:

Պատգամավոր Արուսյակ Ջուլհակյանն իր հերթին հայտարարել էր, որ հայաստանյան ընդդիմադիր շրջանակները ադրբեջանցիներին են փոխանցում հայակական դիրքերի կոորդինատները: Սա բավական լուրջ մեղադրանք է, սակայն, մինչ օրս իրավապահ մարմինները ոչ հերքել են, ոչ էլ հաստատել պատգամավորի կողմից հրապարակայնորեն հնչեցրած այս մեղադրանքը:

Այժմ հարց է առաջանում` իսկ կտարածվի՞ արդյոք ֆեյք նյուզի տարածումը քրեականացնող օրենքը նաև յուրայինների վրա, թե սույն օրենքը կոչված է միայն ընդդիմադիր շրջանականերին լռեցնելուն...