Նոր Հայաստանի աղմկոտ հրաժարականները. ովքեր և ինչ պատճառով հեռացան պաշտոններից

Նոյեմբերի 9-ին վարչապետ Նիկոլ Փաշինյանի կողմից զինադադարի եռակողմ հայտարարության ստորագրումից հետո Հայաստանում տեղի ունեցան մեկ տասնյակից ավելի պաշտոնանկություններ, և այդ պաշտոնյաներից 4-ն «Իմ քայլը» խմբակցության պատգամավորներ էին:

«Իմ քայլը» խմբակցության անդամներ Վարդան Աթաբեկյանը, Թագուհի Թովմասյանը և Լուսինե Բադալյանը նշեցին, որ դուրս են գալիս խմբակցությունից, բայց կգործեն որպես անկախ պատգամավորներ, մինչդեռ պատգամավոր Գայանե Աբրահամյանը տեղեկացրեց, որ դնում է պատգամավորական մանդատն` ընդգծելով, որ որոշումը կայացրել է վաղուց, ինչը պատերազմի պատճառով հետաձգվել էր:

Նշենք, որ Գայանե Աբրահամյանը և փոխվարչապետ Տիգրան Ավինյանի գրասենյակի ղեկավար Վարակ Սիսեռյանը իրենց հրաժարականի մասին ֆեյսբուքում գրառում արեցին Նիկոլ Փաշինյանի` կեսգիշերն անց արված գրառումից հետո, որում, դիմելով զինծառայողներին, վարչապետը նշում էր, թե պետք է «վերջնականապես լուծել պատերի տակ վնգստացողների հարցերը»:

Պաշտոնից ազատման դիմումներ ներկայացրին նաև արտգործնախարար Զոհրաբ Մնացականյանը, ԱԳ փոխնախարար Շավարշ Քոչարյանը, ԱԳ նախարարի խորհրդական Ռուբեն Կարապետյանը, ԱԳ փոխնախարար Ավետ Ադոնցը,, Արտակ Ապիտոնյանը, ԱԳՆ հատուկ հանձնարարություններով դեսպան Կարեն Միրզոյանը, ԱԻ նախարար Ֆելիքս Ցոլակյանը:

Մանդատը վայր դրեց նաև Երևանի ավագանու անդամ Արսեն Կարապետյանը:

Հիշեցնենք, որ ավելի վաղ` նոյեմբերի 8-ին, աշխատանքից ազատման դիմում էր ներկայացրել ԱԱԾ պետի պաշտոնակատար Միքայել Համբարձումյանը, որից հետո հրաժարական ներկայացրեց ԱԱԾ փոխգնդապետ Աշոտ Թաշչյանը, ՀՀ ԱԺ նախագահի խորհրդական Աշոտ Ղուլյանը, վարչապետի աշխատակազմի աշխատակից Տաթևիկ Սողոյանը, ՀՀ Անվտանգության Խորհրդի գրասենյակի վարչության պետ Աշխեն Բեգլարյանը, Շրջակա միջավայրի նախարարաի մամուլի քարտուղար Դավիթ Գրիգորյանը, Հանրային ծառայությունները կարգավորող հանձնաժողովի անդամ Մեսրոպ Մեսրոպյանը: Իր դիմումի համաձայն պաշտոնից ազատվել է ՊԵԿ նախագահի տեղակալ Միքայել Փաշայանը:

Սակայն, հրաժարականների շքերթը Հայաստանում տեղի էր ունենում նաև մինչ կապիտուլյացիոն ակտի ստոգրագրումը:

 Նիկոլ Փաշինյանի իշխանությունից հրաժարական տվեցին և հեռացան ԱԱԾ տնօրեն  Արթուր Վանեցյանը, ոստիկանապետ, հետո մեկ ամսով խորհրդական դարձած Վալերի Օսիպյանը: Ոստիկանապետի տեղակալ Քոչարյանն էլ հեռացավ, որովհետև համարձակվել էր ոլորտային խնդիրների վերաբերյալ մասնագիտական կարծիք հայտնել, որը իշխող պոպուլիստական ռեժիմի վերնախմբի ասածին չէր համընկնում:

Կադաստրի պետական կոմիտեի ղեկավար Սարհատ Պետրոսյանի հրաժարականին, մի քանի օր անց հետևեց՝ Երևանի Կենտրոն վարչական շրջանի ղեկավար Վիկտոր Մնացականյանինը: Առաջինի պաշտոնն ու դիրքը անհամեմատելի են երկրորդինի հետ, տարբեր գործիչներ են, տարբեր անհատներ: Բայց երկուսն էլ նկատելի էին, մանավանդ, որպես իշխանափոխության հետևանքով իրենց զբաղեցրած պաշտոններին հայտնված անձինք: ԱԱԾ-ի պետական պահպանության ծառայության պետ, այդ ոլորտի իրական պրոֆեսիոնալ Գրիգորի Հայրապետովն էլ ազատվեց զբաղեցրած պաշտոնից:

Անհայտ մնաց նաեւ վարչապետի նախորդ գլխավոր խորհրդական Արսեն Գասպարյանի հեռացման պատճառը: Այսինքն՝ մի քանի ամսվա ընթացքում երկու մարդ հեռացան երկրի ղեկավարի գլխավոր խորհրդականի պաշտոնից, բայց պատճառները մնացին անհայտ:

Փաշինյանի հետ բնապահպանական ոլորտում ունեցած անհամաձայնության պատճառով աշխատանքից ազատման դիմումներ էին ներկայացրել բնապահպանության նախարար Էրիկ Գրիգորյանը և փոխնախարար Վարդան Մելիքյանը:

Տնտեսական քաղաքականության հարցերում Փաշինյանի հետ անհամաձայնության արդյունքում աշխատանքից ազատման դիմումներ էին ներկայացրել ՊԵԿ նախագահ Դավիթ Անանյանը և էկոնոմիկայի նախարար Տիգրան Խաչատրյանը:

Փաշինյանի վարած քաղաքականության հետ սկզբունքորեն համաձայն չլինելու արդյունքում հրաժարականի դիմումներ էին ներկացրել Շիրակի , Սյունիքի, Կոտայքի մարզպետները, Գեղարքունիքի փոխմարզպետը: Սոցապ նախարար Մեսրոպ Առաքելյանը:

Երեկ հայտնի դարձավ, որ շրջանառվող նոր հակայակական փաստաթղթի մասին լուրերի ֆոնին հրաժարականի դիմում է ներկայացրել ԱԳՆ նախարար Արա Այվազյանը:

Ինչպես երևում է՝ սա դեռ վերջը չէ և հրաժարականների շքերթը շարունակվելու է: Փաստենք, որ մեկ անձի՝ Նիկոլ Փաշինյանի վարած քաղաքականության հետ անհամաձայնության արդյունքում երեք տարում ավելի շատ բարձրաստիճան պաշտոնյաներ են լքել իրենց պաշտոնները, քան վերջին տաս տարիների ընթացքում՝ միասին վերցրած...