Սևանա լճում ջրի ծաղկման ինտենսիվության թուլացում է նկատվում

ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոն»-ի վերջին դիտարկումների համաձայն Սևանա լճում արդեն սկսվել են ծաղկման պրոցեսները, սակայն ոչ այն ինտենսիվությամբ, ինչպես 2018 թվականին էր: «Արմենպրես»-ի մամուլի սրահում հրավիրված ասուլիսում այս մասին նշեց «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գայանե Շահնազարյանը:

«Ծաղկման պրոցեսի ինտենսիվությունը սովորաբար լինում է հուլիս ամսվա 3-րդ տասնօրյակից սկսած, գործընթացն ավարտվում է օգոստոսի առաջին տասնօրյակում: Կուզենայի նշել, որ 2018 թվականի համեմատ այս տարի սնուցող նյութերը ծաղկման պահին չունեն այդ շատ բարձր կոնցենտրացիաները: Հետևաբար` ծաղկման պրոցեսը այս տարի 2018-ի համեմատ կլինի ավելի թույլ, 2020 թվականի համեմատ նույն ինտենսիվությունը կպահպանվի»,-ասաց Գայանե Շահնազարյանը: Նա տեղեկացրեց, որ ներկա փուլում ծաղկման օջախները Սևանի որոշակի հատվածներում են երևում, այդ պրոցեսները դեռ ամբողջ ծավալով տարածված չեն Սևանում:

Մասնագետը նշեց, որ Սևանում ծաղկման վրա էական ազդեցություն է ունենում լճում սնուցող նյութերի քանակությունը, ջերմաստիճանային պայմանները: Այս տարի լճի ջերմաստիճանը հատակային շերտում բարձր է, թթվածնային կոնցենտրացիան շարունակում է ցածր մնալ:

ՀՀ շրջակա միջավայրի նախարարության Բնության հատուկ պահպանվող տարածքների և կենսաբազմազանության քաղաքականության վարչության պետ Ոսկեհատ Գրիգորյանը տեղեկացրեց, որ Սևանի էկոհամակարգի բարելավման ուղղությամբ տարբեր ուղղություններով աշխատանքներ են նախատեսված: Նախ` Սևանա լճի և նրա ջրահավաք ավազանի մոնիթորինգի համակարգի, կարողությունների բարելավումն է: Նախատեսվում է հզորացնել մոնիթորինգի համակարգը հետագայում Սևանի էկոհամակարգի հետ կապված ավելի համապարփակ տվյալներ ստանալու համար:

«Հաջորդ ուղղությունն օրգանական պարարտանյութերի, ջրխնայող տեխնոլոգիաների կիրառման խթանումն է, որպեսզի հնարավորինս Սևանի էկոհամակարգի վրա մարդածին ազդեցությունը նվազ լինի: Արդեն այս ուղղությամբ կոնկրետ քայլեր ձեռնարկվում են մի շարք համայնքներում, հիմնվել են ջերմոցային տնտեսություններ, կիրառվում է բույսերի մշակման համապատասխան մեթոդոլոգիա և այլն»,-ասաց նա:

Հաջորդ կարևոր ուղղությունը Սևանա լիճ հոսող կոյուղու կոյուղաջրերի խնդրի լուծումն է: Հուլիսից մինչև տարեվերջ արդեն իսկ ընտրված փորձագիտական թիմն իրականացնելու է ուսումնասիրություն ամբողջ դաշտի կոյուղաջրերի հոսքի, ծածկույթի հետ կապված և առաջարկվելու են տարբերակներ, որոնք նպաստավոր են, ճիշտ են կիրառել Սևանա լճի ավազանից կոյուղաջրերի մաքրման տեսանկյունից:

Աշխատանքներ են նախատեսված տեղացիների շրջանում Սևանի հիմնախնդիրների հետ կապված իրազեկման ծրագրերի իրականացման  ուղղությամբ: