«Պատիվ ունեմ» խմբակցությունը հրաժարվել է պարգեւավճարներն ստանալուց. այն կուղղվի պատերազմի մասնակիցների խնդիրների լուծմանը

Այսօր տեղեկացանք, որ ՀՀ անկախության 30 ամյակի առթիվ ԱԺ բոլոր պատգամավորները ստացել են միանվագ դրամական պարգևատրում: «Պատիվ ունեմ» խմբակցությունը հրաժարվում է դրանցից, իսկ փոխանցված գումարներն ուղղելու են պատերազմի մասնակիցների սոցիալական խնդրների լուծմանը։ Նման հայտարարությամբ է հանդես եկել «Պատիվ ունեմ» խմբակցությունը։

«Արցախյան վերջին պատերազմի հետևանքով՝ զոհվել են հազարավոր հայորդիներ, որոնցից շատերն ընտանիքի միակ կերակրողն էին,
հազարավոր պատերազմի մասնակիցներ մինչ օրս կարիք ունեն որակյալ բժշկական օգնության,
տասնյակ հազարավոր տեղահանվածներ չունենալով մշտական տանիք և կայուն ապրուստի միջոց ապավինում են պետության միջոցներից և այլ աղբյուրներից ստացվող սոցիալական օգնություններին,
ինչպես նաև առկա են բազմաթիվ այլ սոցիալական խնդիրներ, որոնք պահանջում են հրատապ լուծումներ:

Հաշվի առնելով այս ամենը, «Պատիվ ունեմ» խմբակցության պատգամավորները չեն կարող լինել այն ազգընտիր պատգամավորների շարքում, որոնք շարունակում են ստանալ պարգևավճարներ, ապրել սովորական կյանքով՝ կարծես ոչինչ տեղի չի ունեցել:

«Պատիվ ունեմ» խմբակցությունը հայտարարում է, որ փոխանցված պարգևավճարները ուղղվելու են վերը նշված սոցիալական խնդիրների լուծմանը»,- նշված է հայտարարության մեջ։