Կրկնակի խոշորացում է արվում Վայք և Զառիթափ համայնքներում, որովհետև ընտրություններին պաշտպանել են «Հայաստան» դաշինքին․ Ղազարյան

«Այս օրենքի նախագիծը չունի որևէ հիմնավորում»․ «ՀՀ վարչատարածքային բաժանման մասին» օրենքում փոփոխություններ և լրացումներ կատարելու մասին ՀՀ օրենքի նախագծի և կից օրենսդրական փոփոխությունների փաթեթի վերաբերյալ խորհրդարանական լսումներին ասաց սահմանադրագետ Էդգար Ղազարյանը։

Վերջինս նշեց, որ վարչապետի որոշմամբ օրենքի նախագծի քննարկման համար ԱԺ ներկայացացուցիչ է նշանակվել ՏԿԵ նախարարը, ոչ թե նախարարի տեղակալը։ Ղազարյանը նախ հետաքրքրվեց՝ կոնկրետ օրենքի նախագիծը ԱԺ-ում որևէ ֆորմատում քննարկելու ժամանակ նախարարի բացակայությունը ի՞նչ պատճառ ունի՝ քաղաքական, կազմակերպական, թե ինտելեկտուալ, ապա հայտարարեց, որ տեղական ինքնակառավարումը պետական իշխանության մաս չի կազմում և ՏԻՄ-երը գործում են ինքնուրույն, սեփական պատասխանատվությամբ, հաշվետու են բացառապես համայնքի բնակիչների առջև։

«Քաղաքական ցանկացած իշխանություն՝ լինի կառավարություն, թե ԱԺ, այդ համակարգի վերաբերյալ ցանկացած որոշում կայացնելուց պետք է լինի չափազանց զգուշավոր և հաշվի առնի բնակչության շահերը, որովհետև ՏԻՄ-երը կոչված են ոչ թե քաղաքական իշխանության պատվերը կատարելու համար, ինչպես նկատում ենք ժամանակակից իշխանության ընկալումների մեջ, այլ համայնքի բնակիչներին հանրային ծառայություն մատուցելու համար»։

Ղազարյանը նշեց, որ օրենքի ու սահմանադրության պահանջն է՝ լսել համայնքի բնակիչներին, կազմակերպել համայնքային հանրաքվեներ։ Այս օրենքի նախագիծը չունի որևէ հիմնավորում։ Սխալ են ընկալումները, սա համայնքի խոշորացման հետ կապ չունի։ Օրինագծում կա և ապախոշորացման, և կրկնակի խոշորացման դեպքեր։

Ղազարյանը նշեց, որ Ջերմուկը, որ ներառում էր Կարմրաշեն և Հերհեր համայնքները, օրինագծով ներառում է միայն Գնդեվազ գյուղը և Ջերմուկ համայնքը։ Ապախոշորացման օրինակ է։

«Կրկնակի խոշորացում է արվում Վայք և Զառիթափ համայնքներում, որովհետև նախորդ խորհրդարանական ընտրությունները Վայքի քաղաքապետը պաշտպանել է «Հայրենիք» դաշինքին, Զառիթափի ղեկավարը՝ «Հայաստան» դաշինքին։ Ահա և պատճառը, ուրիշ բացատրություն չկա»։