Ադրբեջանցիները Երևանին «Էրևան» են կոչում, ասենք` այդպե՞ս է. Դավիթ Բաբայան

ԵԽԽՎ-ում աշնանային նստաշրջանի ընթացքում հայկական պատվիրակության զեկույցում տեղ են գտել ձևակերպումներ, որոնք բխում են հայկական կողմի շահերից: Այս մասին ԼՈՒՐԵՐ.com -ի հետ զրույցում ասաց ԱՀ ԱԳ նախարար Դավիթ Բաբայանը:

«Բավականին երկար ժամանակ ֆինանսական մեծ ռեսուրսներ օգտագործելով՝ Ադրբեջանը համառ պայքարում էր, որ իր ուզած բանաձևերը ԵԽԽվ-ում ներկայացվեն, սակայն դա այնքան էլ նրանց չհաջողվեց: Ամեն ինչ պետք է օբյեկտիվ գնահատենք: Իհարկե, կան այնտեղ որոշ գաղափարներ, որոնք մեզ համար ընդունելի չեն, բայց կան նաև այնպիսիները, որոնք շատ կարևոր են»,- նշեց Դավիթ Բաբայանը` շեշտելով, որ, ամեն դեպքում,  դա այն փաստաթուղթը չէ, որով բեկում է հնարավոր մտցնել Արցախի ճակատագրի մեջ. «Սա մի փաստաթուղթ է, որն իր կարևորությունն ունի, բայց վճռորորոշ դերակատարություն չունի»:

Դավիթ Բաբայանը ընդգծեց, որ բազմաթիվ կարևոր կետեր հայկական կողմին հաջողվել է այդ փաստաթղթում ներառել, այդ թվում՝ նաև վերնագրում. «Զեկույցում կային մի շարք կարևոր կետեր, որոնցում, մասնավորապես, նշվում է, որ Ադրբեջանը ավերում է հայկական պատմամշակութային ճառանգությունները, նշվում է, որ Ադրբեջանի կողմից քայլեր են ձեռնարկվում Արցախի օկուպացված տարածքներում պատմամշակությաին ժառանգությունը ջնջելու մասին, կարևոր է նաև, որ խոսվել է Դադիվանքի մասին: Ընդհանուր առմամբ, կային շատ լավ կետեր, որտեղ Ադրբեջանը ներկայացվում է որպես ագրեսոր երկիր: Բազմաթիվ կարևոր կետեր հայկական կողմին հաջողվել է այդ փաստաթղթում ներկայացնել, այդ թվում՝ նաև վերնագրում՝ օգտագործվել է «Լեռնային Ղարաբաղի հակամարտություն» եզրույթը»,- շեշտեց ԱԳ նախարարը:

Մեր այն հարցին, թե ԵԽԽՎ-ում այդ եզրույթի օգտագործումն դրական ինչ արդյունք կարող է տալ հայկական կողմին, զրուցակիցը պատասխանեց. «Ադրբեջանը ամեն ինչ անում է ցույց տալու համար, որ չկա առհասարակ Լեռնային Ղարաբաղ հասկակացությունը, որ չկա ընդհանրապես այդպիսի կազմավորում և միավորում: ԵԽԽվ-ի պես կազմակերպությունը, երբ իր բանաձևում այդ եզրույթն օգտագործում է, դա նշանակում է, որ ԵԽԽվ-ն համաձայն չէ Ադրբեջանի այդ մոտեցման հետ: Մենք իսկապես շատ սառնասրտորեն պետք է մոտենանաք տարբեր զարգացումներին, հասկանանք, որ հակառակորդը կազմակերպված է աշխատում և շարունակենք մեր քայլերը»,- ասաց Դավիթ Բաբայանը:

Մեզ հետ զրույցում նա նաև անդրադարձավ հասարակության կողմից լայն քննարկման արժանացած ադրբեջանական պատվիրակության առաջարկությանը՝ Սուրբ Ղազանչեցոց եկեղեցու անվանումը դարձնել Ղազանչեցոց/Ղազանչի. «ԵԽԽՎ-ն որևէ առնչություն չունի Սուրբ Ղազանչեցոցի անունը փոխելու կամ չփոխելու հետ: Խնդիրն այստեղ այն է, որ ադրբեջանական կողմը Ղազանչի անվանումն է օգտագործել, բայց դրանից անմիջապես հետո գրվում է Ամենափրկիչ Սուրբ Ղազանչեցոց մայր տաճար: Ադրբեջանցիները ինչ անուն ուզում են թող դնեն, բայց դա չի նշանակում, թե մեզ համար այդ անվանումն ընդունելի է: Ղազանչի անվան կողքին  հնչում է նաև Շուշի անվանումը, և պետք չէ կառչել մի բանից՝ մոռանալով ամենակարևոր հարցերը: Ադրբեջանցիները փորձելու են ամեն ինչ փոփոխել, բայց այդ փոփոխությունները միայն նրանց մոտ են լինելու, հիմա Երևանին էլ «Էրևան» են կոչում, ասենք այդպե՞ս է»,- նշեց նա:

Վերջինս ընդգծեց, որ հայկական կողմը ամեն հարցում կհաղթի միայն մեկ դեպքում՝ միասնականության. «Պետք է միասնական շարժվենք և հասկանանք` Ադրբեջանը քայլեր է ձեռնարկում, անխնա ձևով փող է բաժանում եվրոպական տարբեր կառույցներին, որտեղ արժեհամակարգի լուրջ խնդիրներ կան.  շատ պատգամավորներ ծախվում են, հետևաբար պետք է խաղի կանոնները  ճիշտ պատկերացնել»,- ասաց մեր զրուցակիցը:

Նա այն կարծիքին է, որ պետք չէ սպասել, թե որևէ երկիր հենց այնպես կվարի պրոհայկական կամ պրոադրբեջանական քաղաքականություն. «Մենք պետք է միամտության իրավիճակից դուրս գանք, սա շատ վտանգավոր է, որևէ մեկը հենց այնպես չի վարելու պրոհայկական կամ պրոադրբեջանական քաղաքականություն: Մեկս մյուսի հանդեպ պետք է գոնե հարգալից վերաբերմունք ունենաք, մեր հասարակությունը պառակտված է և մեկը մյուսի դեմ թշնամացած, մինչև մենք միասնական չլինենք և չուժեղացնենք մեր երկիրը ներսից՝ որևէ դրական բան չի ստացվի արտաքին աշխարհում, կամ ստացվելու դեպքում էլ թերի է լինելու: Մեզանից է կախված՝ այս կամ այն երկիրն իրեն ինչպես կդրսևորի, եթե ճիշտ աշխատենք` կհասնենք արդյունքների, սխալ աշխատենք՝ բարդ կլինի»,- եզրափակեց Դավիթ Բաբայանը:

Զվարթ Պետրոսյան