ՊՇՌ թեստի աժիոտաժը. ինչ է սպասվում չպատվաստված աշխատողներին

Պետական համակարգում աշխատողները խուճապի մեջ են: Բանն այն է, որ չեն իմացել՝ ՊՇՌ թեստի բացասական արդյունքի սերտիֆիկատի ներկայացման վերջնաժամկետը ոչ թե հոկտեմբերի 1-ն է, այլ հոկտեմբերի 14-ը: Վերջիններս մտահոգված են, թե արդյոք իրենց ՊՇՌ թեստի վրա վատնած գումարը անիմաստ է եղել և թե արդյոք հոկտեմբերի 14-ին պետք է նորից թեստ հանձնեն: Այս և մի շարք այլ հարցերի պատասխանները ստանալու նպատակով ԼՈՒՐԵՐ.com-ը կապ հաստատեց ՀՀ առողջապահության նախարարի մամուլի քարտուղար Հռիփսիմե Խաչատրյանի հետ. վերջինս զարմանում է՝ որն է քաղաքացիներին տրամադրած ինֆորմացիոն մեծ հոսքից հետո աժիոտաժի պատճառը.

«Ի սկզբանե, օգտագործելով տեղեկատվության տարածման տարբեր հարթակներ, ԱՆ-ն ասել է, որ նախարարի հրամանը ուժի մեջ է մտնում հոկտեմբերի 1-ից և հրամանի մեջ հստակ ասված է՝ այն քաղաքացին, որը պատվաստված չէ, յուրաքանչյուր 14 օրը մեկ պետք է աշխատանքի ներկայանա 72 ժամ վաղեմություն ունեցող ՊՇՌ թեստի բացասական արդյունքը վկայող հավաստագրով: Դա նշանակում է, որ հոկտեմբերի 1-ից 14-ը քաղաքացին ունի ժամանակ ներկայացնելու ՊՇՌ հավաստագիրը, դա կլինի ամսի 1-ին, ուրեմն, քաղաքացին դրանից 14 օր հետո 2-րդը պետք է ներկայացնի: ՊՇՌ հավաստագրի վերջնաժամկետը հոկտեմբերի 14-ն է»,- պարզաբանեց մամուլի քարտուղարը:

Նա հայտնեց, որ մինչև հոկտեմբերի 14-ը տեսչական մարմինը ստուգայցեր կանի, բայց տուգանքներ չի կիրառի, իսկ 14-ից հետո, եթե տեսնի, որ կա աշխատակից, որը չի ներկայացել ՊՇՌ թեստով՝ կտուգանի:

Մեր այն հարցին, թե ինչ է սպասվում այն աշխատողներին, որոնք արդեն հանձնել են ՊՇՌ թեստ, արդյոք նորից պետք է հանձնեն, Հռիփսիմե Խաչատրյանը պատասխանեց. «Ինչ տարբերություն, թե երբ ՊՇՌ թեստը կհանձնեն, դա կլինի ամսի 1-ին, թե 5-ին, միևնույն է այն պետք է հանձնեն: Եթե ենթադրենք՝ քաղաքացին թեստը հանձնել է հոկտեմբերի 2-ին, ապա հաջորդ թեստը պետք է հանձնի հոկտեմբերի 15-ին և այսպես շարունակ»,- ասաց Հռիփսիմե Խաչատրյանը՝ հորդորելով  քաղաքացիներին պատվաստվել. «Այս ամենից խուսափելու և առողջ լինելու համար քաղաքացիները թող պատվաստվեն. մեկ հատ QR կոդ են ցույց տալու և էլ ոչ մի խնդիր»,- ընդգծեց նա:

Վերջինս ԱՆ կատարած աշխատանքը էլ ավելի պատկերավոր ներկայացնելու նպատակով Հայաստանը համեմատեց այլ երկրների հետ. «Այլ երկրներում, հենց տեղում, անգամ, պատվաստվածներից են ՊՇՌ թեստ պահանջում՝ մոլեր մտնելու համար: Նրանք ՊՇՌ թեստի պահանջը դրել են նվազագույն ժամկետով՝ 3 օրով, մենք կարող էինք 3 օր ընդմիջումով ՊՇՌ թեստ պահանջել, բայց մտածել ենք քաղաքացիների սոցիալական բեռի մասին ու մի շարք այլ նրբություններ ենք հաշվի առել, որքան կարողացել ենք, ձգել ենք ՊՇՌ թեստի հանձնման ժամկետը...»,- նշեց Հռիփսիմե Խաչատրյանը:

Հավելենք, որ թեստավորման պահանջի վերահսկումը ստուգայցերի միջոցով իրականացնելու է Առողջապահական և աշխատանքի տեսչական մարմինը։ Ստուգայցերը կատարվելու են պատահական։ Խախտումների դեպքում նախատեսված է տուգանք, իրավաբանական անձանց դեպքում՝ 40 000 – 120 000 դրամ։

Զվարթ Պետրոսյան