Սեւանում բացվեց Արցախյան վերջին պատերազմում հերոսացած Գորիս Վարագյանի խաչքար-հուշարձանը

Սեւան համայնքի Ցամաքաբերդ թաղամասում տեղի է  ունեցել Արցախյան 44-օրյա պատերազմի հերոս Գորիս Վարագյանին նվիրված  հուշարձան-խաչքարի բացման արարողություն:

Ինչպես տեղեկացրին Սեւանի համայնքապետարանի աշխատակազմից, խաչքար-հուշարձանի բացման եւ օրհնման  արարողակարգին մասնակցել են Սեւան համայնքի ղեկավար Սարգիս Մուրադյանը, Սեւանի համայնքապետարանի եւ Հայ Առաքելական եկեղեցու Գեղարքունյաց թեմի  հոգեւոր դասի ներկայացուցիչներ, Գորիսի մայրն ու հարազատները, ընկերներն ու մտերիմները, ցամաքաբերդցիները:

«2020-ի 44-օրյա պատերազմում իր կյանքը զոհաբերած, հավերժի ճամփան բռնած, 20-ամյակը չբոլորած ժամկետային զինծառայող Գորիս Վարագյանն արծվի թռիչքով ընդմիշտ վերադարձել է հայրենի Ցամաքաբերդ, որ դառնա հայրենասիրության օրինակ ու դասագիրք, որ հսկի իր հայրենիքի սահմանները, որ պատմի իր ու իր նման նահատակված հերոսների մասին:
Երախտապարտ ցամաքաբերդցիներն իրենց հերոս զավակի հիշատակը հավերժացրել են թաղամասի կենտրոնական հատվածում հուշարձան-խաչքարի տեղադրմամբ:
Մեր քաջ ու լուսավոր Գորիսին նվիրված հուշարձան-խաչքարը ծածկվեց թարմ ծաղիկներով, և նրա հայացքի ներքո հյուսվեցին հերոսին բնութագրող, նրա մասին պատմող խոսք ու զրույցները:
Ամիսներ առաջ էլ Ցամաքաբերդ թաղամասի թիվ 5 միջնակարգ դպրոցի ռազմագիտության  դասասենյակն անվանակոչվեց Գորիս Վարագյանի անվամբ, որտեղ դպրոցի այսօրվա ու վաղվա աշակերտները հայրենասիրության եւ հայրենապաշտության իրենց առաջին դասերն են սերտելու»,- ասաց Սեւանի համայնքապետարանի աշխատակազմի քարտուղար Արմինե Ղուկասյանը: