Նոր ԱԷԿ-ի կառուցում, գազի գին, ջրի պաշար, էլեկտրական տրանսպորտ․ Արա Նռանյանը՝ նոր խնդիրների մասին

«Հանձնաժողովի պատասխանատվության տիրույթում են Հայաստանի համար ռազմավարական նշանակություն ունեցող ոլորտները։ Դրանք երկրի տնտեսության այն հատվածներն են, որոնք առնչվում են բոլոր քաղաքացիների, տնտեսվարողների ու պետության շահերին, ունեն կարևորագույն սոցիալ-տնտեսական նշանակություն, ինչպես նաև հսկայական ազդեցություն երկրի անվտանգության մակարդակի վրա։ Հանձնաժողովը կոչված է վարելու այնպիսի գործունեություն, որը կհավասարակշռի բոլոր կողմերի շահերը՝ ներառելով սպառողներին, խոշոր տնտեսվարողներին, և, առհասարակ, պետությունը»: Այս մասին ԱԺ-ում ասաց ՀՀ հանրային ծառայությունները կարգավորող հանձնաժողովի անդամի պաշտոնում առաջադրված Արա Նռանյանը:

Անդրադառնալով էներգետիկայի ոլորտին՝ Նռանյանը նշեց, որ, թեեւ երկարացնում ենք Հայկական ատոմային էլեկտրակայանի շահագործման ժամկետը, սակայն պետք է գիտակցենք, որ դա հավերժ չի կարող շարունակվել, եւ առաջիկայում կանգնելու ենք նոր խնդիրների լուծման անհրաժեշտության առջև։

«Դրանց բարդությունն, առաջին հերթին, պայմանավորված է այն հանգամանքով, որ դրանց լուծումը պահանջելու է ոչ միայն ֆինանսական միջոցներ, այլ նաև ժամանակ», - նշեց նա՝ ընդգծելով, որ ատոմակայանի խնդիրներին ծանոթ է։

«Մեծ է հավանականութունը, որ որոշ ներդրումների պարագայում կարող ենք մեկ անգամ ևս շարունակել երկարացնել ատոմակայանի շահագործումը, սակայն հենց այսօր պետք է մտածենք նոր հզորությունների մասին։ Ատոմակայանը պարտադրում է մեր էլեկտրաէներգիայի մինչև 40 տոկոսը ու որքան էլ մենք փորձենք զարգացնել այլընտրանքային էներգետիկան կամ իրականացնենք էներգախնայող միջոցառումներ, պետք է լինենք իրատես. առաջիկա տարիների համար ավանդական էներգետիկան այլընտրանք չունի», - ասաց նա։

Նռանյանը դրական ազդակ արձանագրեց այն, որ նոր ատոմակայանի կառուցման մասին գրված է կառավարության ծրագրում։ Վերջինս հավելեց նաև, որ գուցե առաջիկայում Հայաստանը պետք է մտածի էլեկտրական տրանսպորտին անցնելու մասին։ Թեկնածուն նաև ելույթում անդրադարձավ գազի գնին, ջրային պաշարներին, բնապահպանական խնդիրներին ու տրանսպորտին։