Ադրբեջանի տարածքային ամբողջականությունը ճանաչելը մեծ հարված կլինի Արցախին. Սեյրան Օհանյան

«Մենք չունենք ոչ այն իրավապայմանագրային հենքը, ոչ այն ռազմաքաղաքական իրավիճակը Հայաստանում եւ տարածաշրջանում, ոչ այն քարտեզները, որոնք հիմք կհանդիսանան սահմանների ճշտման ուղղությամբ: Խաղաղության պայմանագիր ստորագրել այս իրավիճակում Ադրբեջանի հետ, նշանակում է ճանաչել Ադրբեջանի տարածքային ամբողջականությունը, որը շատ մեծ հարված կլինի Արցախի Հանրապետությանը և Արցախի ժողովրդին՝ իրենց պատմական տարածքում ապրելու իրավունքը պաշտպանելու համար»,- այս մասին ԱԺ-ում լրագրողների հետ ճեպազրույցում ասաց պաշտպանության նախկին նախարար, «Հայաստան» խմբակցության ղեկավար Սեյրան Օհանյանը։

Նա ընդգծեց, հատկապես, որ քարտեզները, որոնցով պետք է ճշգրտումներ իրականացվեն Ադրբեջանը չունի․ «Հղում են անում ռազմական, զինվորական, Խորհրդային միության քարտեզների, սակայն Ադրբեջանն ինքն է հրաժարվել ԽՍՀՄ իրավահաջորդը լինելուց»,- նշեց պատգամավորը։

Սեյրան Օհանյանը հիշեցրեց՝ երբ խոսվում է սահմանների անվտանգության, հետագայում դրանց ճշտման գործընթացի մասին, տարբեր քաղաքացիներ հիշեցնում են Վարչատարածքային բաժանման մասին օրենքը, որի հիմնական շեշտը ՀՀ ներքին սահմանային ճշտումներն են, ոչ թե արտաքին. «ՀՀ իշխանությունները պետք է հասկանային, որ մանավանդ Սյունիքի սահմաններում մենք չպետք է հետ շարժվեինք մեր կանգնած տեղերից: Ալիևի հոխորտանքները, հռետորաբանությունն ուղղված են նրան, որ պարտադրի ՀՀ-ին սահմանների բացման, ճանապարհների ապաշրջափակման եւ միջանցքի ձեւավորման շրջանակներում կապ հաստատել Նախիջեւանի հետ՝ իրենց հեռահար նպատակների իրականացման համար, հետագայում նաեւ Միջին Ասիա: Նոյեմբերի 9-ի հայտարարության մեջ նշված է, որ կողմերը գոնե Սյունիքի հատվածում կանգնում են այն բնագծերում, որտեղ ավարտվել են մարտական գործողությունները, պատերազմը։ Եթե իշխանությունները բանակցությունների փորձ ունենային, ապա կհասկանային՝ հակառակորդը դժվարությամբ է հետ քաշվելու այն կետերից, որտեղ իրենց զինվորներիի ոտքերն են դրված»։