Աֆղանստանի մզկիթներից մեկում պայթյուն է որոտացել․ մոտ 100 մարդ է զոհվել (լուսանկարներ)

Մոտ 100 մարդ է զոհվել, տասնյակ մարդիկ վիրավորվել են ուրբաթ օրը՝ Աֆղանստանի հյուսիսում մզկիթում տեղի ունեցած հզոր պայթյունի հետևանքով: Այս մասին հայտնում է Aamaj News լրատվական գործակալությունը: Հարձակումը տեղի է ունեցել տեղի ժամանակով մոտ 13: 30-ին (Երևանի ժամանակով՝ 13:00-ին) ուրբաթօրյա աղոթքի համար հավաքված մարդկանց մեծ բազմության ներկայությամբ: Նախնական տվյալներով՝ մահապարտը պայթուցիկ սարքը գործի է դրել կրոնական շենքի ներսում:

Պայթյունի մասին հաղորդագրությունը հաստատել են երկրում իշխանությունը զավթած  «Թալիբան» արմատական ​​շարժման ներկայացուցիչը և Աֆղանստանի ժամանակավոր կառավարության տեղեկատվության և մշակույթի փոխնախարար Զաբիուլլահ Մուջահիդը: Ինչպես նշվում է, սա այս տարածաշրջանում առաջին պայթյունն է օգոստոսի 8 -ին թալիբների վերահսկողության տակ անցնելուց հետո: