Ո՞ւմ մտքով է անցել, որ տոնը կարելի է խլել մարդուց. հունվարի 7-ի մեռելոցն եք խլում. Գեղամ Նազարյանը՝ նախարարին

ՀՀ ազգային ժողովի ընդդիմադիր պատգամավորները միանշանակ չեն ընդունում Ամանորյա տոներին աշխատանքային օրերը կրճատելու նախագիծը՝ շեշտելով, որ բիզնեսը կարող է տուժել, մարդիկ հանգստի հնարավորությունից կզրկվեն: 

«Հայաստան» դաշինքից Գեղամ Նազարյանն ասաց, որ երբ նախագիծը դրվել է շրջանառության մեջ, իրեն հանդիպող յուրաքանչյուր երրորդ մարդուց մեկը խնդրել է, որ պատգամավորն ԱԺ-ում անցկացնի մեկ հարց: «Ու՞մ մտքով է անցել, որ տոնը կարելի է խլել մարդուց: Դուք նշեցիք՝ այս ամենն արվում է, որ մեր ժողովուրդն աշխատի: Դուք նկատե՞լ եք, որ մեր ժողովուրդը չափից ավելի է աշխատում, մեր ժողովուրդն աշխատում է կիրակի օրերին շինհրապարակներում, տոնական օրերին խանութներում, մոլերում, մեր ժողովուրդը հանգիստ, որպես այդպիսին, չունի: Եթե համեմատենք եվրոպական երկրների հետ, այնտեղ տարին երկու անգամ արձակուրդ են գնում, զբաղվում են իրենց հանգստով, առողջությամբ: Մեզ մոտ դեկտեմբերի 31-ից հունվարի 7-ը գոնե առիթ էր մի մասի համար՝ ընտանիքով հավաքվելու, հանգստանալու, տոնը նշելու համար»,- ասաց պատգամավորն ու հարցրեց՝ ճի՞շտ է, որ այդ ամենի հիմնական նպատակը հունվարի 7-ն աշխատանքային օր հռչակելու մոտիվ գտնելն է:

Նա նկատեց՝ մնացած 4 տաղավար տոներին հաջորդած մեռելոցներին ևս հանգիստ չի տրվում:

Քերոբյանը կարճ պատասխանեց. «Իմ և իմ գործընկերների մտքով է անցել: Բայց պարզվում է՝ նաև ձեր գործընկերների մտքով է դա վաղուց անցել: Այդ նախագիծը դեռևս Կարեն Կարապետյանի կառավարությունն է փորձել անցկացնել: Այնպես չէ, որ մենք այստեղ միակն ենք, նաև ձեր գործընկերներն են կարծել, որ դա ճիշտ նախագիծ է»,- ասաց Քերոբյանն ու վստահեցրեց՝ բիզնես հանրությունը լայն կոնսենսուս ունի, բոլորը կողմ են այդ նախագծին: