Վահան Քերոբյանի հերթական սայթաքումը. «ջուր ծեծոցին» շարունակվում է

Աժ-ում քննարկվում է էկոնոմիկայի նախարարի կողմից բերված՝ ամանորի տոնական և հանգստյան օրերը կրճատելու մասին նախագիծը: Վահան Քերոբյանը, ինչպես երևում է,  առանձնապես չի խորացել հարցի նրբությունների մեջ, և դա է պատճառը, որ նախագծի հիմքում չկա գեթ մեկ լուրջ հիմնավորում: Կամ էլ այդ հիմնավորումները տարատեսակ ցիտատների և մտքի գոհարների տեսքով են, դիցուք՝ 44-օրյա պատերազմը կարող է չպարտվեինք, եթե 26 տարի շարունակ քիչ հանգստանայինք: Թե այդ երկու գործոնը իրար հետ ինչ կապ ունեն՝ հայտնի է միայն  Վահան Քերոբյանին:

Սա, ի դեպ, միակ ջուր նախագիծը չէ, որ ներկայացրել է էկոնոմիկայի նախարարը: Լուրջ հիմնավորումներով աչքի չէր ընկնում նաև հուլիսի 12-ին կառավարության կողմից հաստատված օրենքի նախագիծը, որով առաջարկվում է պետական լիցենզիոն տուրք սահմանել պղնձի, մոլիբդենի խտանյութի և որոշ հարակից այլ ապրանքների նկատմամբ։

Հայաստանի զբոսաշրջային ռազմավարությունը, որով առաջնորդվելով Քերոբյանը խոստանում էր 319 տոկոսի հասնող զբոսաշրջության աճ, նույնպես զուրկ էր որևէ հիմնավորումից:

Կառավարության այսօրվա նիստում բուռն քննարկումից հետո ընդունվեց Էկոնոմիկայի նախարար Վահան Քերոբյանի ներկայացրած որոշման նախագիծը, համաձայն որի` պետությունը միջնորդավորված կերպով հնարավորություն է ունենալու ներդրումներ կատարել մասնավոր ընկերություններում: Նախագծին դեմ էր կառավարության ֆինանսական բլոկը:

Թե որտեղից է Քերոբյանը գտնում զավեշտի հասնող հիմնավորումներ իր նախագծերը կազմելու համար, և ինչ թվեր ու հաշվարկներ է դնում դրանց հիմքում՝ անհասկանալի է: Մնում է երկու տարբերակներից մեկը՝ կա՛մ Քերոբյանը որպես էկոնոմիկայի նախարար դիլետանտ է, կա՛մ տնտեսագիտական մտքի հանճար...: