Սահմանային իրավիճակի վերաբերյալ փակ քննարկմանը ներկայացված անձինք լիարժեք չէին տիրապետում ռազմաքաղաքական խնդիրներին. Սեյրան Օհանյան

Ընդդիմությունը երկար ժամանակ գերատեսչությունների ղեկավարներին հրավիրում էր ԱԺ՝ սահմանի շուրջ ստեղծված մտահոգիչ հարցերի շուրջ պարզաբանումներ ստանալու: Շուրջ երկու ամիս ԱԺ ղեկավարությունը և գործադիրը չէին կարողանում քննարկումը կազմակերպել, ստիպված հրատապ հարցով մենք քննարկում կազմակերպեցինք: Այս մասին այսօր՝ հոկտեմբերի 29-ին, խորհրդարանական ճեպազրույցի ժամանակ ասաց «Հայաստան» խմբակցության ղեկավար Սեյրան Օհանյանը՝ նշելով, որ ընդդիմությունը հանդիպման արդյունքներից գոհ չէր, քանի որ գերատեսչությունների ներկայացուցիչներն ամբողջական տեղեկության չէին տիրապետում.

«Մենք եկանք այն եզրակացության, որ այդպիսի հրատապ քննարկման շրջանակներում լավ կլիներ, որ գերատեսչությունների առաջին դեմքերը ներկայանան, քանի որ ներկայացված անձինք լիարժեք չէին տիրապետում իրավիճակին՝ հատկապես ռազմաքաղաքական խնդիրներին»,-ասաց Օհանյանը: