Թուրքիայի հետ գնալ խաղաղության՝ ժամանակավրեպ է և նշանակում է խաղաղություն մուրալ. Օհանյանը պատասխանում է Փաշինյանին

Նիկոլ Փաշինյանը նոյեմբերի 7-ին իր ունեցած հարցազրույցի ժամանակ տեսակետ հայտնեց, որ ներկայիս ընդդիմադիրները, որոնք դեմ են հայ-թուրքական բարիադրացիական հարաբերություններին և կարծում են, որ այն հայ ժողովրդին թրքացման է տանում, ժամանակին հենց իրենք Թուրքիայի հետ հարաբերությունները բարելավելու փորձեր են կատարել:

Խորհրդարանում ընդդիմադիր «Հայաստան» խմբակցության ղեկավար Սեյրան Օհանյանը ԼՈՒՐԵՐ.com-ի հետ զրույցում ասաց, որ նախկին իշխանությունն էլ, ընդդիմությունն էլ երբևիցե դեմ չեն եղել տարածաշրջանում խաղաղության և տարածաշրջանային երկրների հետ դիվանագիտական հարաբերություններին՝ նույն Թուրքիայի հետ. «Նախկին իշխանությունը դեմ չէ Թուրքիայի հետ դիվանագիտական հարաբերություններին, սակայն առանց նախապայմանների: Նախապայմանները Արցախի հարցն է և մեր Ցեղասպանության խնդիրը, այդ պատճառներով էլ նախկին իշխանությունների կողմից դա մերժվեց: Այս ամենը տարբերվում է այսօրվա իրավիճակից»,- նշեց Սեյրան Օհանյանը՝ ընդգծելով՝ այսօր չկա այդ իրավապայմանագրային հենքը: 

Անդրադառնալով Նիկոլ Փաշինյանի այն հայտարարությանը, թե ընդդիմության օրակարգում չկա խոսք հայ-թուրքական հարաբերությունների վերաբերյալ, պատգամավորն ասաց, որ իրենց հիմնական թեզը դիմադրողականություն ստեղծելն ու Հայաստանի թրքացման և Արցախի հայաթափմանը ոչ ասելն է. «Այս ամենը համընկել է այն խոսակցությունների հետ, որ ասում են՝ սպասվում է նոր փաստաթղթի ստորագարում. հիմա այդ  փաստաթուղթը կստորագրվի հանդիպման ժամանակ, թե առանց հանդիպման, այն կստորագրվի նոյեմբերի 9-ին, թե դեկտեմբերի 1-ին, միևնույն է, անշրջելի կդարձնի այն կապիտուլյացիոն փաստաթուղթը, որը եղել է 2020 թվականի նոյեմբերի 9-ին»,-նշեց Սեյրան Օհանյանը:

Նա համոզված է, որ մինչև թուրք-ադրբեջանական սադրանքը, ադրբեջանցիներին և թուրքերին հաջողվել է այստեղ գտնել իրենց աջակիցներ, գործակիցներ, որոնց միջոցով էլ փորձ է արվել պատերազմի ժամանակ ազդել հայ ժողովրդի ներքին միասնականության վրա: Նա ընդգծում է, որ վերջին, 44-օրյա պատերազմում ժողովրդի կողմից մեծ միասնականություն չարտահայտվեց.

«Ադրբեջանի և Թուրքիայի կողմից բացահայտ սադրանք է կիրառվում հայ և Արցախի ժողովրդի նկատմամբ: Երբեք չի դադարել նրանց ռազմական, ստիպողական, ճնշողական հռետորաբանությունը Հայաստանի նկատմամբ: Այս ամենի ֆոնին գնալ նրանց հետ խաղաղության՝ ժամանակավրեպ է. նշանակում է գնալ և խաղաղություն մուրալ թուրքերի մոտ»,- նշեց մեր զրուցակիցը:

Վերջինս ասաց, որ թեև Ադրբեջանն ու Թուրքիան խոսում են խաղաղության մասին, այնուամենայնիվ, հայ ժողովրդի նկատմամբ կեղծ խաբկանք է դա, քանի որ դեռ գտնվում են ՀՀ սահմաններին. «Թուրք-ադրբեջանական պատերազմից հետո ադրբեջանցիներն ու թուրքերը այսօր հայտնվել են ՀՀ տարածքում, մխրճվել են մեր սահմաններից ներս և ետ չեն գնում: Խաղաղության թեզի ջատագովները առաջինն իրենք պետք է սահամաններից հեռանան»,- ընդգծեց նա: 

Խոսելով ճանապարհների ապաշրջափակումից, պատգամավորն ընդգծեց, որ միջանցքի բացման գաղափարը կամ ճանապարհների ապաշրջափակումը բերելու է հայ ժողովրդի և Արցախի խորը շրջափակման. «Իրենք տնտեսապես ճնշելու են մեզ նաև փոխելու են ժողովրդագրական պատկերը այն տարածքներում, որտեղ որ ճանապարհներ կամ միջանցքներ կբացվեն. ինչ է սա, եթե ոչ աստիճանական Հայաստանի հանրապետության թուրքացում: Արցախը գտնվում է շատ վտանգավոր վիճակում, վտանգված է նաև Արցախի ինքնորոշումն ու ապագան, վտանգ կա հայաթափման. այս ամենը միանշանակ է»,- նշեց Սեյրան Օհանյանն՝ ընդգծելով, որ այսօր միայն ՌԴ խաղաղապահ ուժերն են  հանդիսանում Արցախի ժողովրդի անվտանգության երաշխիքը: 

Անդրադառնալով գերիների հարցին՝ Սեյրան Օհանյան ասաց, որ ԱԺ-ում անհետ կորածների հարազատների հետ հանդիպման ժամանակ շատ մեծ բաց են նկատել. «Մենք պարզեցինք, որ ՀՀ-ում չկա շատ կարևոր գերիների, պատանդների և անհետ կորածների հանձնաժողովը, որը ծրագրային գործունեություն պետք է ծավալի՝ համադրելով բոլոր գերատեսչությունների ջանքերը գերիների, պատանդների, անհետ կորածների խնդիրները լուծելու համար, եթե այդ հանձնաժողովը չկա, նշանակում է, որ արդյունավետ գործունեություն ևս չկա»,- ասաց նա:

Զվարթ Պետրոսյան