Ավանեսյանը շարունակում է Արսեն Թորոսյանի «ավանդույթները». ո՞ր ԲԿ-ին են «լավ աչքով» նայում

Առողջապահության նախարար Անահիտ Ավանեսյանը կրկին հայտնվել է բավականին պիկանտ պատմության կիզակետում: Մամուլը գրել էր, որ վերջերս ԱԱԾ աշխատակիցները մտել են նախարարի ընկերուհու՝ նրա կողմից նշանակված աշխատակազմի ղեկավար-գլխավոր քարտուղար Վարդուհի Գրիգորյանի աշխատասենյակ, ուսումնասիրել նրա համակարգիչը եւ տարել են Գրիգորյանի էլեկտրոնային նամակագրությունը: Ստուգումների առիթը եղել են էլեկտրոնային կառավարման «Mulberry» համակարգում կատարված գրառումները, իսկ ավելի ստույգ՝ Պետական առողջապահական գործակալության (ՊԱԳ) պետ Ծաղիկ Վարդանյանի գրառումը: Ծ. Վարդանյանը, ըստ իրավապահներին մոտ մեր աղբյուրի, «Mulberry» համակարգում գրառում է արել, որտեղ նշել է, որ ինքը չի մասնակցել պետպատվերի բաշխմանը՝ «Բժշկական օգնություն-սպասարկում» հոդվածներով: Փաստորեն, հիվանդանոցներին եւ պոլիկլինիկաներին տրամադրվող գումարների բաշխումն իրականացրել են առողջապահության նախարար Անահիտ Ավանեսյանն ու նախարարության աշխատակազմի ղեկավար Վարդուհի Գրիգորյանը, որը նախարարի ամենահավատարիմ մարդն է համակարգում:

Պետական գումարները բաշխելիս խտրականություն է դրվել բուժհաստատությունների միջեւ: Ըստ հաստատությունների ներկայացրած կատարողականների` փողերը տվել են տարբեր չափերով․ մեկին՝ ներկայացված գերակատարված ծախսի 50 տոկոսի չափով, մյուսին՝ 30: Օրինակ, խոշոր ԲԿ-ները՝ «Արմենիան», «Էրեբունին», «Աստղիկը», ավելի շահեկան վիճակում են հայտնվել, քան, ասենք, մարզային ԲԿ-ները: Հիրավի առյուծի բաժին է ստացել «Արմենիա» ԲԿ-ն՝ Հանրապետական հիվանդանոցը, մոտ 188 մլն դրամ՝ 1 մլրդ 200 մլն դրամից, ինչը քիչ չէ, եթե հաշվենք, որ այս 1,2 մլրդ դրամը 100-120 կազմակերպության միջեւ է բաշխվում, եւ հաշվի առնենք, որ «Արմենիա» ԲԿ-ի գլխավոր տնօրեն Գրիգոր Գրիգորյանն ԱՆ աշխատակազմի ղեկավար Վարդուհի Գրիգորյանի հորեղբայրն է, որ նրա հայրը եւս այդ ԲԿ-ում է աշխատում: 

նշենք, որ Հրապարակ կայքը հարցում էր ուղարկել ԱԱԾ պետին` փորձելով ճշտել՝ արդյո՞ք ստուգումների վերաբերյալ այս տեղեկությունն ամբողջությամբ կամ մասամբ համապատասխանում է իրականությանը եւ ի՞նչ չափով։  ԱԱԾ կողմից ո՛չ հերքվում են, ո՛չ հաստատվում տվյալ տեղեկությունները, ոչ էլ դրանց առհասարակ անդրադառնում են։ ԱԱԾ քննչական դեպարտամենտը շրջանառում է վաղուց տարածած մի հաղորդագրություն, որը վերաբերում է վերջերս հրապարակված՝ պաշտոնատար անձանց կողմից ծանր հետեւանքների զուգորդմամբ պաշտոնեական անփութության դեպքին, որն արդեն ուղարկվել է Քննչական կոմիտե: 

Ստացվում է՝ հերթական անգամ փորձ է արվում ջրից չոր դուրս բերել յուրային նախարարին, հակառակ դեպքում՝ ինչպե՞ս պետք է բնութագրել պատկան մարմինների լռությունը և անգործությունը: Հիշեցնենք, որ պետպատվերների հետ կապված սկանդալի կիզակետում էր հայտնվել նաև նախկին նախարար Արսեն Թորոսյանը:  Թորոսյանն իր կնոջ ՄԻԲՍ բժշկաախտորոշիչ կենտրոնի պետական ֆինանսավորումը 2019-ի սկզբին, նախորդ տարվա համեմատ, 2.5 անգամ ավելացրել էր՝ 22.72 մլն-ից դարձնելով 57․04 մլն դրամ: Թորոսյանն անգամ այն ժամանակ ինչ-որ պարզաբանումներ տվեց, թե պետպատվերը հավասարաչափ է բաշխվում, և կապ չունի, որ այդ կենտրոնի տնօրենն իր կինն է։ Այն ժամանակ իրավապահները ջրեցին այս հարցը և, կարծես թե, նման մի վարքագծի էլ ականատես ենք լինում հիմա, քանի որ իշխանությունների համար յուրայինները առավել կարևոր են, քան արդարության սկզբունքը, որը պաշտպանելու խոստումով վերջիններս եկել էին իշխանության:

Այս թեմայով Ֆրանսիայի նոր կառավարությունում հայ նախարարներ կլինեն Ֆրանսիայի նոր կառավարությունում հայ նախարարներ կլինեն Ֆրանսիայի նոր կառավարությունում հայ նախարարներ կլինեն Նախարարներից ո՞վ հաջորդը հրաժեշտ կտա պաշտոնին Ճապոնիայի կառավարության գլխավոր քարտուղարը և մի քանի նախարարներ հրաժարական են տվել