Փաշինյանն անդրադարձել է «3+3» ձեւաչափին

Նոյեմբերի 7-ին Հանրային հեռուստաընկերությանը տված հարցազրույցում ես ասել եմ, որ այստեղ մեզ համար կա մի կարեւոր նրբություն՝ մեզ համար չափազանց կարեւոր է, որ այն հարցերը, որոնց քննարկման համար արդեն իսկ կան ձեւավորված ֆորմատներ, դրանք «3+3»-ում չենք քննարկում: Այս մասին առցանց ասուլիսի ժամանակ հայտարարեց վարչապետ Նիկոլ Փաշինյանը՝ անդրադառնալով տարածաշրջանային «3+3» ձեւաչափին մասնակցելու Վրաստանի հրաժարվելուն եւ ՀՀ դիրքորոշմանը:

«Օրինակ, Ղարաբաղի հարցի կարգավորումը, որի համար կա Մինսկի խմբի համանախագահության ձեւաչափը, «3+3»-ում չենք քննարկելու: Տարածաշրջանային կոմունիկացիաների ապաշրջափակման հարցը քննարկելու համար կա՞ եռակողմ հանձնաժողովը, դա «3+3»-ում չպետք է քննարկվի: Պետք է քննարկվեն այնպիսի հարցեր, որոնք ունեն կոնտեքստային նշանակություն եւ չեն քննարկում այլ ձեւաչափերում քննարկվող հարցերը: Կարո՞ղ են գտնվել այդպիսի հարցեր, կապրենք՝ կտեսնենք:

Կառավարության ծրագրում հստակ նշել ենք, որ առանձնահատուկ տեղ ենք հատկացնելու տարածաշրջանային քաղաքականությանը՝ մեզ համար շատ կարեւոր են հարաբերությունները ԵԱՏՄ-ի շրջանակում, ՌԴ-ի, ՀԱՊԿ-ի, ԵՄ-ի, ԱՄՆ-ի հետ, բայց ուզում ենք ավելի ակտիվ տարածաշրջանային քաղաքականություն վարել, շատ կարեւոր են հարաբերությունները նաեւ Վրաստանի հետ: Եթե մենք տեսնենք, որ մեր հարաբերությունները ակտիվացնելու եւ պոզիտիվ օրակարգ ձեւավորելու հնարավորություն կա, միգուցե եւ քննարկենք այդ հնարավորությունը: Այս պահին սա է մեր դիրքորոշումը, մնացածը հետագայում կերեւա»,- հայտարարեց Փաշինյանը: