Նիկոլ Փաշինյանի նախընտրական և հետընտրական հայտարարությունների տարբերությունները

ՀՀ վարչապետ Նիկոլ Փաշինյանի հունիսին՝ նախընտրական շրջանում արված մի շարք հայտարարություններ հետընտրական շրջանում հերքվում են հենց իր՝ Նիկոլ Փաշինյանի կողմից: Վերջինս բացահայտ կերպով հակասում է ամիսներ առաջ իր իսկ կողմից արած մի շարք հայտարարություններին` այժմ էլ պնդելով լրիվ հակառակը:

Դիցուք՝ հունիսին Նիկոլ Փաշինյանը հայտարարում էր, որ գերիները մեկ-երկու ամիս կներեն, եթե ստիպված լինեն սպասել, այնուհետև նրանք կվերադառնան տուն: Այսօր արդեն Փաշինյանը հայտարարում է, որ այդ գործընթացի արագ հանգուցալուծում ակնկալել պետք չէ: Ավելին՝ վարչապետը դեռ հռետորական հարց է բարձրացնում, թե պետք է պարզել՝ ով է գերին: Այսինքն` մեկ-երկու ամսվա փոխարեն հայ գերիները թշնամու վերահսկողության տակ կարող է գտնվեն անորոշ ժամանակով, իսկ վերադառնալուց հետո էլ չի բացառվում, որ դատվեն:

Հունիսին Փաշինյանը խոստանում էր, որ յուրաքանչյուր տարի կենսաթոշակը պետք է ավելանա 6.3 տոկոսով: Ընտրություններից հետո կառավարությունը ավետեց, որ թոշակները բարձրացվում են 2000 դրամով, այն էլ ոչ բոլորի համար: 

Հունիսին Փաշինյանը պնդում էր, որ ՀՀ սուվերեն տարածքից ոչ մի մետր չի գտնվում թշնամու վերահսկողության տակ: Ընդամենն օրեր առաջ էլ ԱԺ-ում, իսկ հետո նաև ասուլիսի ժամանակ Փաշինյանը հայտարարեց, որ թշնամական ագրեսիայի արդյունքում ՀՀ տարածքից 41 կմ այս պահին օկուպացված է:

Հունիսին Փաշինյանը հայտարարել էր, որ այսօր ավելի շատ հնարավորություններ կան Ղարաբաղի հարցը մեր պատկերացումներին համապատասխան լուծելու համար: Օրեր առաջ վարչապետը նշեց, որ չկա Ղարաբաղի հարցի հայանպաստ լուծում, կա միայն լուծում:

Հունիսին նախընտրական հանդիպումներից մեկի ընթացքում Փաշինյանը հայտարարեց, որ ժողովրդից որևէ գաղտնիք չունի, ամեն քայլ կատարելու է բաց և թափանցիկ: Ընտրություններից հետո հակառակորդ պետության զինված ուժերը փակեցին ՀՀ մի շարք ռազմավարական ճանապարհներ, համացանցում հայտնվեց այն փատաթուղթը, որի հիման վրա էլ ճանապարհները փակվել են: Կառավարությունը, ասել է թե՝ Փաշինյանը, ոչ հերքեցին, ոչ էլ հաստատեցին այդ փաստաթղթի իսկությունը:

Փաշինյանը նախընտրական փուլում հայտարարում էր, որ անկլավային և միջանցքային տրամաբանությունը ՀՀ իշխանությունները մերժում են: Օրեր առաջ ասուլիսի ժամանակ Փաշինյանը հստակ չպատասխանեց՝ կարո՞ղ է ընդունելի լինել Տիգրանաշենի եւ Ոսկեպարի ճանապարհահատվածների՝ Ադրբեջանին անցնելը:

Նախընտրական շրջանում Փաշինյանը հոխորտում էր, որ Սև լճի 30 տոկոսի համար պատերազմ չի պատրաստվում սկսել: Այսօր արդեն պահանջում է քննել, թե ինչպես է պատահում, որ ադրբեջանցիները քայլելով մտնում են հայկական դիրքեր:

Ինչպես տեսնում ենք՝  Նիկոլ Փաշինյանը շարունակում է հեղափոխությունից սկիզբ առած արատավոր պրակտիկան, երբ նախընտրական հայտարարությունները և խոստումները որևէ աղերս չեն ունենում հետընտրական պրոցեսների հետ: