Թուրքիան փոխել է երկրի միջազգային անվանումը

Թուրքիայի նախագահ Ռեջեփ Թայիփ Էրդողանը հրամանագիր է ստորագրել, որով երկրի միջազգային բրենդը փոխվել է Turkeyի֊ից Türkiye֊ի, հայտնում է Anadolu-ն։

Թուրքիայի նախագահ Ռեջեփ Թայիփ Էրդողանը աշխարհին հիշեցրել է, թե ինչպես պետք է «ճիշտ գրել» իր երկրի անունը։ Մինչ այժմ թուրքական արտադրության արտահանման արտադրանքի վրա դրվում էր «Made in Turkey» կնիքը։ Բայց Turkey֊ն էթնոնիմի անգլերեն ուղղագրությունն է, մինչդեռ թուրքերենում 1928 թվականին օսմաներենի արաբերեն գրությունից լատինատառին անցնելուց հետո երկիրը սկսեց կոչվել Türkiye:

Լատինական այբուբենը և բառերի թուրքերեն արտասանությունը ներդաշնակեցնելու համար բարեփոխումների ընթացքում տառերը հատուկ ընտրվել են եվրոպական տարբեր լեզուներից՝ շվեդերեն, գերմաներեն, ռումիներեն, ալբաներեն և այլն: Թուրքիայի կառավարության Resmi Gazete թերթում հրապարակված շրջաբերականում ասվում է, որ Türkiye արտահայտությունը լավագույնս ներկայացնում և արտահայտում է թուրք ազգի մշակույթը, քաղաքակրթությունն ու արժեքները։ «Այս համատեքստում արտահանման արտադրանքում մենք կօգտագործենք Made in Türkiye-ն՝ Made in Turkey-ի փոխարեն: Մեր արտադրանքը, որը երկրի հպարտությունն է միջազգային առևտրում, ամբողջ աշխարհին կներկայացվի Türkiye բառով»,֊ասվում է շրջաբերականի մեջ։

 Türkiye անվանումն այժմ կօգտագործվի նաև թուրքական բոլոր պաշտոնական փաստաթղթերում։