«Քրեական գործ կհարուցվի, եթե քննությամբ պարզվի, որ զինծառայողը զենքը վայր է դրել և գերի հանձնվել». Ալեն Սիմոնյան

«Այն բոլոր զինծառայողները, որոնք վայր են դրել իրենց զենքը եւ հանձնվել են գերության, դա քննությամբ կպարզվի, նրանց նկատմամբ քրեական գործ է հարուցվելու, ամենայն հավանականությամբ, եւ դա իմ ասածը չի, դա օրենքի պահանջն է»: Այս մասին, այսօր՝ դեկտեմբերի 7-ին, ԱԺ-ում լրագրողների հետ զրույցում ասաց Ազգային ժողովի նախագահ Ալեն Սիմոնյանը։

«Բանակցային պրոցեսում մենք մշտապես այդ հումանիտար հարցը բարձրացրել ենք ու բարձրացնելու ենք: Ես ականատես եմ եղել, որ մեր գործընկերները նստում, հետազոտում են, թե իմ բանակցային գործընթացի ընթացքում ես որ հանդիպման ժամանակ ինչ հարց եմ բարձրացրել: Պետք է վստահեցնեմ, որ բոլոր մեր քննարկումների ժամանակ այդ հարցը բարձրացվել է ոչ միայն իմ կողմից, այլ իմ բոլոր գործընկերների կողմից եւ շարունակելու է բարձրացվել: Բայց այն մարդիկ, որոնք չեն կատարել իրենց ծառայողական պարտականությունը, զենքը վայր են դրել ու հանձնվել են գերի... ես տեսնում եմ նաեւ, որ ֆեյսբուքում այդ «հերոս» բառը բավականին արժեզրկվել է, բոլորի նկատմամբ  հավասար սանդղակ կիրառելու պատճառով: ՀՀ բանակում կան բազմաթիվ հերոս տղաներ, նրանք շատ են, նրանք մեր հպարտությունն են, բայց, ցավոք, կան զինվորներ և սպաներ, որոնք իրենց պարտականությունը չեն կատարել և հայտնվել են գերության մեջ»,-նշեց Սիմոնյանը:

Լրագրողի դիտարկմանը, թե ինչու է կանխակալ վերաբերմունք ձևավորել, եթե նախաքննությունը դեռ չի ավարտվել, Ալեն Սիմոնյանը պատասխանեց.

«Ես կանխակալ վերաբերմունք չեմ ձևավորում, ես ասում եմ, որ ՀՀ օրենքը, նաև վարչապետն է դրա մասին խոսել ԱԺ ամբիոնից, որ քրեական օրենսգիրքը նախատեսում է՝ նման դեպքերում պետք է պատասխանատվություն լինի։ Այդ պատասխանատվությունը կրելու են այն բոլոր մարդիկ, որոնք օրենք են խախտել և ՀՀ սահմանը պաշտպանելու փոխարեն նախընտրել են հանձնվել: ՀՀ-ում չկա′ որևիցե պաշտոնյա, չկա′ որևիցե անձ, որը որ օրենք խախտելու պարագայում չի ենթարկվելու պատասխանատվության»,- նշեց ԱԺ նախագահը:

Հիշեցնենք, որ այսօր սկանդալային տեսանյութ է տարածվել համացանցում, որտեղ ԱԺ նախագահ Ալեն Սիմոնյանը ասում է.

«Կներես, ես համարում եմ, որ էդ գերիները չկան»: