«Ժամանակ ենք տալիս, որ մանդատները վայր դնեն»․ ԱԺ-ի դիմաց ակցիան ավարտվեց

Ազգային ժողովի դիմաց ավարտվեց բողոքի ցույցը, որը կազմակերպվել էր ԱԺ-ում տեղի ունեցած ծեծկռտուքից հետո։

Սկզբում ցուցարարները պահանջում էին այդ ծեծկռտուքին մասնակցած ՔՊ–ական պատգամավորների հետ հանդիպում, բայց քանի որ նրանք այդպես էլ չհայտնվեցին, սկսեցին պահանջել նրանց հրաժարականը։

«Մենք գտնում ենք, որ այն պատգամավորները, որոնք առնչվել են էս դեպքի հետ, իրենք իրավունք չունեն պատգամավոր լինելու եւ պահանջում ենք, որ վայր դնեն մանդատները: Եթե վայր չեն դնում մանդատները, հետագա գործողությունների ամբողջ պատասխանատվությունը կրելու են իրենք:

Ողջամիտ ժամանակ ենք տալիս, որ մանդատները վայր դնեն։ Թող Նոր տարին էլ անցնի, դա իրենց նվեր՝ Նոր տարուն էլ պատգամավոր լինեն, բայց հետո հրաժարական տան։ Ազգային ժողովի պատգամավորը` ազգընտրյալը, իրավունք չունի իրեն խուլիգանի պես պահել», - ասաց ՀՅԴ Երևանի քաղաքային կոմիտեի նախագահ Սարգիս Կարապետյանը:

Նա տեղեկացրեց, որ վաղը «Հայաստան» դաշինքի պատգամավորները ԱԺ նիստին ավելի կոնկրետ պահանջներ կներկայացնեն ծեծկռտուք կազմակերպած պատգամավորներին։

Ավելի վաղ հայտնել ենք, որ այսօր՝ դեկտեմբերի 7-ին, ԱԺ-ում «Հայաստան» խմբակցության պատգամավոր Իշխան Սաղաթելյանի օգնականը լրագրողներին պատմել է, որ ինքը միջանցքով անցնելիս ձայներ է լսել և մոտենալով տեսել է, որ իշխող խմբակցության պատգամավորները փոխնախագահ Ռուբեն Ռուբինյանի աշխատասենյակում մի քանի հոգով ծեծի են ենթարկել ընդդիմադիր պատգամավորների երեք օգնականներին։ Մասնավորապես՝ ծեծողների թվում նա ճանաչել է Վահագն Ալեքսանյանին, Հրաչյա Հակոբյանին, տեսել է նաև Սիսակ Գաբրիելյանին։ Նա պնդում է, որ անվտանգության աշխատակիցները ներկա են եղել, սակայն որևէ կերպ չեն միջամտել։

Նրա խոսքով՝ մասնավորապես, ծեծի են ենթարկվել Արմենուհի Կյուրեղյանի, Թադեւոս Ավետիսյանի եւ Իշխան Սաղաթելյանի օգնականները, այդ թվում Գերասիմ Վարդանյանը։