Ոչ մեկ ոչ մի լուծում չտվեց՝ բացառությամբ ՍԴ-ի. Վարդևանյանը՝ պատգամավորների կալանքից ազատ արձակման մասին

ՀՀ ազգային ժողովի ընդդիմադիր «Հայաստան» խմբակցության պատգամավոր Արամ Վարդևանյանն անդրադարձավ իրենց խմբակցության՝ կալանքից ազատ արձակված պատգամավորներին՝ շեշտելով, դեռ 4-5 ամիս առաջ էին ասել, որ նրանց կալանավորումն աբսուրդ է: Վարդևանյանն այս մասին ասաց ԱԺ ճեպազրույցում:

«Օգոստոսի 2-ին՝ 8-րդ գումարման ԱԺ առաջին նիստում մեր խմբակցությունը, «Պատիվ ունեմ» խմբակցությունը հայտարարում էինք, որ կալանավորումն աբսուրդ է պատգամավորի կարգավիճակ ունեցող անձի դեպքում, եթե չկա ԱԺ համաձայնությունը: Մի քանի անգամ նույնիսկ Սահմանադրության 96-րդ հոդվածը բառացիորեն ընթերցվել է ԱԺ նիստի ընթացքում, այդ ընթերցողներից մեկը ես եմ եղել: Բայց դուք տեսա՞ք՝ որքան պետք է տևեր այս գործընթացը, որ այս պարզ ճշմարտությունն արձանագրվեր»,-ասաց Վարդևանյանը:

Նա նշեց՝ 4-5 ամիս պահանջվեց՝ ամենապարզ ճշմարտությունն արձանագրելու համար՝ այն էլ սահմանադրական արդարադատության ճանապարհով:

Պատգամավորը մեղադրեց դատավորներին՝ իրենց խմբակցության պատգամավորներին կալանավորելու որոշում կայացնելու համար: «Ոչ մեկ ոչ մի լուծում չտվեց՝ բացառությամբ Սահմանադրական դատարանի, որը, իհարկե, ծայրահեղ միջոց է, բայց կյանքը ցույց տվեց, որ գործուն միջոց էր»,-ասաց Վարդանյանը:

Սահմանադրական դատարանը դեկտեմբերի 9-ին բավարարել էր ԱԺ «Հայաստան» խմբակցության պատգամավորների դիմումը՝ արձանագրելով, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, չի կարող պահվել անազատության մեջ: Դեկտեմբերի 10-ին դատարանի որոշմամբ ազատ էին արձակվել խմբակցության անդամներ Արմեն Չարչյանը, Մխիթար Զաքարյանը և Արթուր Սարգսյանը:

Մխիթար Զաքարյանը մեղադրվում է խուլիգանություն կատարելու համար, իսկ Արթուր Սարգսյանը մեղադրվում է առաջադրվել պաշտոնեական լիազորությունները չարաշահելու և պաշտոնեական կեղծիք կատարելու համար: Նրանք չեն ընդունում իրենց մեղադրանքները: Իսկ ԱԺ արտահերթ ընտրություններին մասնակցող կուսակցությունների դաշինքի պատգամավորության թեկնածուների ցուցակում ընդգրկված Արմեն Չարչյանը ձերբակալվել էր «Իզմիրլյան» ԲԿ-ի աշխատակիցներին ԱԺ արտահերթ ընտրություններին մասնակցելուն առերևույթ հարկադրելու դեպքի առթիվ ՀՀ ՀՔԾ-ում քննվող քրեական գործի շրջանակներում ՀՀ քրեական օրենսգրքի 154.2-րդ հոդվածի 4-րդ մասի 2-րդ կետով նախատեսված հանցանք կատարելու կասկածանքով (ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը): Հունիսի 23-ին դատարանը բավարարել էր ՀՔԾ քննիչի կողմից ներկայացված միջնորդությունը՝ Արմեն Չարչյանի նկատմամբ կալանավորումը որպես խափանման միջոց ընտրելու համար։ Չարչյանն իրեն առաջադրված մեղադրանքը չի ընդունում։