Պատգամավորների «աչքը» գործադիրի վրա է. ովքե՞ր չեն հաշտվում պաշտոնի իջեցման հետ

Նոր գումարման Ազգային Ժողովում ՔՊ-ի պատգամավորական ցուցակը համալրեցին ոչ վաղ անցյալում գործադիրում աշխատող պաշտոնյաներ: Ժամանակը ցույց տվեց, որ այդ պաշտոնյաները, մեղմ ասած, չեն հաշվտվում իրենց կարգավիճակի իջեցման հետ և ամեն գնով փորձում են վերադառնալ գործադիր:

Դիցուք՝ առողջապահության նախկին նախարար Արսեն Թորոսյանը: Վերջինիս մասով մամուլը պարբերաբար գրում է, որ Թորոսյանը չի հրաժարվում գործադիր վերադառնալու մտքից: Սկզբում նա ակնհայտ քաղաքական կսմիթներ էր հասցնում ներկայիս նախարար Ավանեսյանին` նրան մեղադրելով միայն պատվաստման վրա կենտրոնացած լինելու մեջ, այնուհետև Ավանեսյանի դեմ աշխատանքի լծվեց սորոսական մեդիան, սակայն Թորոսյանը հաջողության այդպես էլ չհասավ: Հաջորդ անգամ նա փորձեց ինքնաառաջադրվել փոխվարչապետի պաշտոնում, սակայն, ըստ մամուլի, Նիկոլ Փաշինյանի կողմից այդ քայլը աջակցության չարժանացավ:

Տրանսպորտի և կապի նախկին նախարար, սկանդալից հետո պաշտոնը լքած Հակոբ Արշակյանը թեև այսօր զբաղեցնում է ԱԺ փոխխոսնակի պաշտոնը, սակայն, այդ դիրքում բավականին պասիվ է: Փոխարենը` նա հաճախ է խոսում տեղեկատվական տեխնոլոգիաների ոլորտից և այն ձեռքբերումներից, որոնք, ըստ Արշակյանի, արձանագրվել են իր կառավարման տարիներին: Այդպես Արշակյանը, կարծես, փորձում է առավել շահեկան դիրք ստանալ ներկայիս նախարար Վահագն Խաչատրյանի նկատմամբ, ով իր հերթին բավական քիչ է անդրադառնում ոլորտային հարցերին: Սա թույլ է տալիս ենթադրել, որ Արշակյանը նույնպես դեմ չէ վերադառնալ գործադիր:

Պատգամավոր Արմեն Խաչատրյանն իր հերթին, կարծես թե, ցանկանում է վերադառնալ մարզպետի փեշակին: Նախկին և ներկա մարզպետների միջև ըստ մամուլի սեւ կատու է անցել Գորիսի ընտրություններից հետո, քանի որ տեղացիները` մարզպետի գլխավորությամբ, ցանկացել են առաջադրել փոխմարզպետ Կարո Ավանեսյանին, սակայն հաղթել է Խաչատրյանը եւ իր մտերիմ, երբեմնի ՀՀԿ-ական Վլադիմիր Աբունցին է առաջադրել։ Ըստ մամուլի՝ փոխմարզպետի կինը՝ Արմինե Սիմոնյանը, անգամ ստատուս է գրել Խաչատրյանի դեմ․ «Էս էն հանրության կողմից ընդունված Վլադիմիրն ա, հա՞, մարդ, որը թալանել ա տամոժնյան, մարդ, որի հայրը ղարաբաղյան կլանի ներկայացուցիչ ա, մարդ, որը թալանչի ա․․․ մարդ, որի կինը Նիկոլի ճանապարհն էր փակում, հիմա պիտի գա ու Գորիսը թալանի»: Սակայ,ն գրառումը ժամեր անց հեռացվել է, իսկ կոնֆլիկտը մինչ օրս չի մարում։  Խաչատրյանն ակնհայտորեն փորձում է իր դիրքերը ամրապնդել մարզում և վերադառնալ նախկին պաշտոնին:

Իր հերթին Վահե Ղալումյանը, ով նախկինում եղել է Տավուշի մարզպետ,թեև հանգրվանել է ԱԺ-ում, սակայն մինչ օրս զբաղվում է մարզում կուռացիա անելով: Մասնավորապես, Իջևանում ՏԻՄ ընտրությունների ՔՊ-ի թեկնածու Արթուր Ճաղարյանը Ղալումյան եղբայրների հետ բավականին մտերմիկ հարաբերությունների մեջ է: Թե՛ իշխանական պատգամավոր Վահե Ղալումյանի, թե՛ նրա մարզպետ եղբայր Հայկ Ղալումյանի «դաբրոյով» է, որ Ճաղարյանը ներկայացվել է իշխանություններին ու արժանացել որպես թեկնածու առաջադրվելու հավանությանը: Այս մասին բազմիցս գրել է մամուլը:

Առողջապահության նախարարի պաշտոնը զբաղեցնելու անթաքույց ցանկություն ունի նաև պատգամավոր Նարեկ Զեյնալյանը, ընդ որում՝ վաղուց:  Այն ժամանակ, երբ Նիկոլ Փաշինյանը լարված էր ՀՀ առողջապահության նախկին նախարար Արսեն Թորոսյանի հետ, Զեյնալյանին էր միայն վստահում առողջապահության ոլորտը, իսկ կորոնավիրուսի ժամանակ նրան հատուկ Փաշինյանն էր հրավիրել կորոնավիրուսի թեմայով հանձնաժողովի բոլոր նիստերին: Սակայն, նախարարական պորտֆել Զեյնալյանը այդպես էլ չստացավ, միևնույն ժամանակ նա, կարծես թե, չի պատրաստվում հեշտ հանձնվել:

Ինչպես տեսնում ենք՝ խորհրդարանում հանգրվանած ՔՊ-ականները չեն խորշում անգամ սեփական թիմակիցների դեմ աշխատելուց, միայն թե վերդառնան ավելի բարձր կարգավիճակ ունեցող պաշտոնների: Ակնհայտ է, որ վերջիններս չեն ցանկանում օգտվել ընձեռված հնարավորությունից՝ օրենսդրական աշխատանք տանել հանուն հպարտ քաղաքացիների ավելի լավ ապագայի, այլ մտածում են միայն սեփական ապագան դասավորելու մասին: