Ոստիկանության ծառայողները զինանոց են հայտնաբերել. կան ձերբակալվածներ

Ոստիկանության Արմավիրի բաժնի ծառայողները հայտնաբերել են, որ Այգեշատ գյուղի բնակիչ, 19-ամյա մի երիտասարդ մեքենայում հրազեն է պահում։

Այս մասին հայտնում են Ոստիկանությունից և նշում, որ դեկտեմբերի 10-ին երիտասարդը հայտնաբերվել ու, մեքենայով հանդերձ, բերման է ենթարկվել բաժին։ Զննությամբ մեքենայի բեռնախցիկում հայտնաբերվել է գործարանային համարով «Կալաշնիկովի» ինքնաձիգ։

Դեպքի առթիվ քրեական գործ է հարուցվել։ Երիտասարդը ձերբակալվել է։

Հարուցված քրեական գործի շրջանակում խուզարկվել են նաև երիտասարդի կողմից շահագործվող մյուս մեքենան ու բնակարանը։ Նշվում է, որ «Գրանտ Չերոկի» մակնիշի ավտոմեքենայի խուզարկությամբ հայտնաբերվել են գործարանային համարով «Կալաշնիկովի» ինքնաձիգ, պայթուցիչով նռնակ, դետոնատորի պայթուցիչներ, ինքնաձիգի պահունակներ, որոնցից մեկը լիցքավորված էր 17 փամփուշտով, տարբեր տրամաչափի և հրազենների 2000-ից ավելի փամփուշտ և այլն։

Բնակարանի խուզարկությամբ ևս գործարանային համարով «Կալաշնիկովի» ինքնաձիգ է հայտնաբերվել, ինչպես և թմբուկավոր ատրճանակ, ինքնաձիգի պահունակներ, որոնցից մեկը լիցքավորված էր 26, մյուսը՝ 30 փամփուշտով։

Արմավիրի ոստիկանները տեղեկություն են ձեռք բերել նաև, որ ավտոմեքենաներում և բնակարանում հայտնաբերված զենք-զինամթերքը 19-ամյա երիտասարդին տվել էր Արմավիրի մարզի Ալաշկերտ գյուղի բնակիչ, 30-ամյա մի տղամարդ, որը դեկտեմբերի 11-ին հայտնաբերվել, բերման է ենթարկվել բաժին ու ձերբակալվել։ Նրա բնակարանի խուզարկությամբ հայտնաբերվել է ապօրինի պահվող գործարանային համարով հրացան։ Ոստիկանության Արմավիրի բաժնում հարուցված քրեական գործն ուղարկվել է Արմավիրի մարզային քննչական վարչություն։

Նշանակվել է դատաձգաբանական փորձաքննություն։ Հանգամանքները պարզվում են։

 Ծանուցում. ենթադրյալ հանցանքի մեջ կասկածվողը կամ մեղադրվողը համարվում է 

անմեղ, քանի դեռ նրա մեղավորությունն ապացուցված չէ ՀՀ քրեական դատավարության

 օրենսգրքով սահմանված կարգով` դատարանի` օրինական ուժի մեջ մտած դատավճռով: