Ծնողները մտահոգված են, որ Բարձրաշեն համայնքի դպրոցի շենքը կփլվի երեխաների գլխին. Թովմասյանի ահազանգը

«Պատիվ ունեմ» խմբակցության պատգամավոր Թագուհի Թովմասյանը ֆեյսբուքյան էջում գրառում է արել Արարատի մարզի Բարձրաշեն համայնքի դպրոցում ջեռուցման բացակայության մասին։

«Երեկ տեղեկացա, որ Արարատի մարզի Բարձրաշեն համայնքի դպրոցում ծնողները բողոքի ակցիա են իրականացնում. նրանք բողոքում են, որ դպրոցը ջեռուցում չունի, եւ երեխաները վերարկուներով են դասի նստում:

Սա դեռ ամենը չէ. դպրոցի շենքը վթարային վիճակում է գտնվում: Ծնողները մտահոգված են. ասում են, որ շենքը կփլվի երեխաների գլխին: Այս խնդրի մասին նրանք արդեն երկու տարի է, ինչ ահազանգում են եւ նշում են, որ եթե այս տարի հարցը չլուծվի, երեխաներին պարզապես դպրոց չեն բերի: Անվտանգային խնդիրներին զուգահեռ՝ մարդիկ բարձրացնում էին նաև դպրոցում տարրական կենցաղային պայմանների բացակայության հարցը:

Իմ շտապ հանձնարարականով ահազանգից անմիջապես հետո ԱԺ Մարդու իրավունքների պաշտպանության և հանրային հարցերի մշտական հանձնաժողովի քարտուղարության փորձագետը կապ է հաստատել ՀՀ Արարատի մարզպետարանի կրթության բաժնի պետի հետ: Վերջինս նշել է, որ դպրոցը ստացել է 4-րդ կարգի վթարային աստիճան, և բազմաթիվ դիմում-բողոքներից հետո Կառավարությունը դպրոցի վերանորոգումը ներառել է 2022 թ. համապատասխան ծրագրում։ Այս պահին մասամբ վերանորոգվել են հոսանքալարերը, որպեսզի հնարավոր լինի էլեկտրական տաքացուցիչներով ջեռուցել դասասենյակները։

Հետևողական եմ լինելու խնդրի կարգավորման հարցում. երեխաների իրավունքները մեր երկրում պետք է լինեն պաշտպանված»,-գրել է նա: