Յուրայիններից ո՞վ կդառնա Նիկոլ Փաշինյանի հաջորդ «զոհը»

Երևանի քաղաքապետարանի շուրջ ծագած կրքերը չեն մարում: Ինչպես գիտենք՝ ավագանու «Իմ քայլը» խմբակցությունը որոշել է անվստահություն հայտնել գործող քաղաքապետին և երեկ երեկոյան վերջապես ներկայացրել է նաև այն հիմնավորումը, որի հիման վրա էլ սկսվել է այս գործընթացը: Պարզվում է` Մարությանից որոշել են ազատվել, քանի որ վերջինս չի կատարել նախընտրական շրջանում տված իր խոստումները և չի վերացրել համակարգային կոռուպցիան քաղաքապետարանից:

Եթե հենց սա է Մարությանին հեռացնելու իրական պատճառը, ապա պետք է փաստել, որ այս հոդվածով աշխատանքից պետք է ազատված լիներ ՔՊ-ական պաշտոնյաների ճնշող մեծամասնությունը:

Դիցուք՝ Էջմիածնի քաղաքապետը խոստանում էր քաղաքից մաքրել կրիմինալը: Գրեթե յուրաքանչյուր օր լուր է ստացվում Էջմիածնում տեղի ունեցող կրիմինալ ռազբորկաների, զոհերի և տուժածների մասին: Էջմիածնում նույնիսկ մի շարք բողոքի ակցիաներ կազմակերպվեցին` ընդդեմ Գասպարյանի. քաղաքացիները դժգոհում էին նրա կառավարումից և վերաբերմունքից:

Ամիսներ առաջ պարզ էր դարձել, որ վարչապետի աշխատակազմի արդեն նախկին ղեկավար, այսօր արդեն պատգամավոր Էդուարդ Աղաջանյանը պետական տարբեր միջոցառումներ կազմակերպելու համար ավելի քան 500 հազար դոլար է փոխանցել իր մտերիմներին պատկանող ընկերություններին։ Միջոցառումներ կազմակերպելու համար մրցույթ չի անցկացվել, և վարչապետի աշխատակազմը մեկ անձից է գնում կատարել։

Քննչական կոմիտեի նախագահ Արգիշտի Քյարամյանը` Կոտայքի թեմի առաջնորդի որդին, իր անձնական հաշվեհամարին ունի ավելի քան 110 հազար դոլար, իր կինը 10 հազար դոլար արժեցող թանկարժեք զարդեր է գնում և սա այն դեպքում, երբ նա 28 տարեկան է, նախկինում միայն պետական պաշտոններ է զբաղեցերել և ինչպես ինքն է հավաստում` բիզնեսով երբեք չի զբաղվել։ Երբ լրագրողները հետաքրքրվեցին, թե որտեղից այդքան կարողություն, երիտասարդը հայտարարեց, որ պարտավոր չէ հաշվետու լինել հանրությանը, իսկ բարձրացված աղմուկից հետո ասաց, որ իր կարողությունը գոյացել է քեռիների և ՌԴ-ում «խոպան» գնացած բարեկամների նվիրատվությունների արդյունքում։

Էկոնոմիկայի նախարար Վահան Քերոբյանը խոստանում էր հորդացող ներդրումներ և երկնիշ տնտեսական աճ: Բացի այդ, նրա ղեկավարած կառույցում այս ընթացքում կոռուպցիայի մեղադրանքով բարձրաստիճան պաշտոնյա է ձերբակալվել:

Արմավիրի նախկին մարզպետ, արդեն փոխվարչապետի պաշտոնը ստանձնած Համբարձում Մաթևոսյանը խոստանում էր  անկատար խոստումներ չթողնել, այնուհետև ինքն էլ խոստովանել էր, որ տված խոստումների մեծ մասը դեռևս չի հասցրել իրականություն դարձնել :

Դիցուք՝ Արմավիրի մարզի Լենուղի համայնքի 4-րդ կարգի վթարային 1-ին եւ 3-րդ շենքերի բնակիչների խնդիրը արդեն երկար տարիներ է՝ չի լուծվում: Բնակիչները հույս ունեին, որ հեղափոխությունից հետո, նոր իշխանությունները մի բան կանեն: 4-րդ կարգի վթարային այս շենքերում 22 ընտանիք է բնակվում, գրեթե բոլոր ընտանիքներում անչափահաս երեխաներ կան, իսկ շենքն, ըստ ԱԻՆ-ի, անգամ նորոգման ենթակա չէ, էլ ուր մնաց, թե բնակվելուն պիտանի լինի: Ամիսներ առաջ բնակիչները բողոքի ցույցեր էին անում կառավարության մոտ, մայիս ամսին անգամ համայնքի դպրոցի մուտքն էին փակել: Համբարձում Մաթեւոսյանը խոստացել էր խնդիրը լուծել: Խոստացել էր և ինչպես շատ հաճախ պատահում էր հին և բարի ժամանակների չինովնիկների հետ…մոռացել էր: Մարզպետը նաև խոստացել էր լուծել չմշակվող հողերի հարցը, մինչդեռ այսօր Արմավիրի մարզում կա դեռ շուրջ 21000 հա հողատարածք, որոնք չեն մշակվում: ՏԻՄ վերջին ընտրություններից օրեր առաջ էլ մարզպետի որոշումով շուրջ 20 միլիոն դրամի սոցիալական օգնություն է բաժանվել:

Սփյուռքի գործերով գլխավոր հանձնակատար Զարեհ Սինանյանը խոստանում էր լայնածավալ ներգաղթ կազմակերպել, հետո ինքն էլ հետ կանգնեց իր խոստումից: Սփյուռքի հետ հարաբերությունների կարգավորման փոխարեն ստացանք այդ հարաբերությունների տոտալ ձախողում: Իսկ համակարգային կոռուպցիայի մասին շշուկներն սկսեցին գնալ այն բանից հետո, երբ շուրջ մեկ տասնյակ աշխատակիցներ առանց որևէ հիմնավորման վարչապետի որոշումով ազատվեցին սույն կառույցից:

Քաղավիացիայի կոմիտեի ղեկավար Տաթևիկ Ռևազյանը պաշտոնը ստանձնելիս խոստանում էր նոր վերելքների հասցնել հայկական ավիացիան: Վերելքը՝ ԵՄ սև ցուցակում հայտնվելն էր և երկինքը՝ ադրբեջանական օդանավերի համար բացելը: Ինչ վերաբերվում է կոռուպցիային, ապա բավ է միայն նշել, որ կոմիտեն մինչ օրս աուդիտ չի անցել և գործընթացը դոփում է տեղում:

Ստացվում է, որ Փաշինյանի և ՔՊ-ի տրամաբանությամբ այս բոլոր պաշտոնյաները պետք է հեռացվեն զբաղեցրած դիրքերից և ընդհանրապես համարվեն՝ անհուսալի տարրեր, քանի որ նրանք նույնպես արել են այն, ինչը մեղսագրվում է Հայկ Մարությանին: Եթե ՔՊ-ի տարածած հայտարարության մեջ իշխանություններն անկեղծ ձևակերպումներով են հանդես եկել, ապա պետք  է ապացուցեն դա՝ պատժելով և հեռացնելով նաև վերը նշված պաշտոնյաներին, հակառակ դեպքում` կապացուցվի, որ այս դրվագում գործ ունենք բացառապես քաղաքական նպատակահարմարության հետ: