«Մարությանին պաշտոնից հեռացնելը ներկուսակցական հարց է դարձել»

Վաղը՝ ժամը 10:00-ին, սպասվում է իշխանության կողմից նախաձեռնած արտահերթ նիստը, որի ժամանակ քննարկվելու է քաղաքապետի անվստահություն և նոր քաղաքապետի ընտրություն, որը, ըստ մեր իրավական կարգավորումների, տեղի է ունենալու մեր քվեարկությամբ: Այս մասին այսօր՝ դեկտեմբերի 21-ին, լրագրողների հետ զրույցում ասաց Երևանի «Լույս» խմբակցության ավագանու անդամ Դավիթ Խաժակյանը:

Նա նշեց, որ Մարությանին պաշտոնից հեռացնելու պատճառները, որոնք հիմա արտահայտում է իշխող ուժը, քաղաքացիների համար հասկանալի չեն. «3 տարի շարունակ, երբ մենք քննադատում էինք քաղաքապետի գործունեությունը, թե՛ իշխող ուժը, թե՛ վարչապետը իրենց պաշտպանությունն էին հայտնում այդ անարդյունավետ կառավարման ձևին: Հիմա, երբ կարծես որևէ բան առանձնապես չի փոխվել արդեն առաջ է քաշվում անվստահության հարցը և սա է հիմնական տրամաբանությունը և պատճառը, որ ես չմիացա այս նախաձեռնությանը: Դրանով չի փոխվում Մարությանի կառավարման գործունեության իմ գնահատականը: Կարծում եմ, սա դարձել է ներկուսակցական հարց քաղպայմանագրի համար»,- նշեց ավագանու անդամը:

Վերջինս ընդգծեց՝ տարօրինակ կլիներ, որ 3 տարի քննադատելուց հետո ինքը պաշտպաներ Մարությանի գործունեությունը:

Հիշեցնենք, որ այսօր նախատեսված է Երեւանի ավագանու հերթական նիստը, որի օրակարգում 38 հարց է, սակայն «Իմ քայլը» խմբակցությունը բոյկոտում է նիստը: Իսկ վաղը՝  դեկտեմբերի 22-ին՝ ժամը 10:00-ին, կանցկացվի Երևան քաղաքի ավագանու նիստ, որի օրակարգում «Երևանի քաղաքապետ Հայկ Մարությանին անվստահություն հայտնելու մասին» Երևան քաղաքի ավագանու որոշման նախագիծն է։