Թուրքական ռազմական ինքնաթիռները տասնյակ անգամներ խախտել են Հունաստանի օդային տարածքը

Թուրքական ռազմական ինքնաթիռները հինգշաբթի և ուրբաթ օրերին տասնյակ անգամներ խախտել են Հունաստանի օդային տարածքը և թռել հունական երեք կղզիների վրայով։ Այս մասին հայտնել է Հունաստանի ազգային պաշտպանության գլխավոր շտաբը, հաղորդում է ՏԱՍՍ-ը։

«Չորս թուրքական F-16 կործանիչների խումբը ուրբաթ օրը թռավ Ինուս կղզու վրայով 24000 ֆուտ (7315 մետր) բարձրության վրա, ավելի ուշ թուրքական F-16 զույգը թռավ Ռո կղզու վրայով 27000 ֆուտ (8229 մետր) բարձրության վրա և այնուհետև նույն երկու ինքնաթիռները թռան Պանայա և Ինուս կղզիների վրայով 29000 ֆուտ (8839 մետր) բարձրության վրա»,- հայտնել է Հունաստանի ERT1 հանրային հեռուստատեսությունը:

Ինչպես նշում է Proto Thema թերթը, հինգշաբթի օրը, երբ Հունաստանում նշվում էր Աստվածահայտնության տոնը, Թուրքիան «շարունակեց իր սադրիչ գործողությունները՝ չնայած երկու երկրների միջև առկա վստահության միջոցներին, որոնք նախատեսում են ռազմական գործողությունների կանխարգելում ազգային և կրոնական մեծ տոների ժամանակ:

Նշվում է, որ նախօրեին Թուրքիան կատարել է Հունաստանի օդային տարածքի 37 խախտում, որից 35-ը՝ CN-235 ինքնաթիռներով, եւս երկուսը՝ F-16 կործանիչներո։

Գլխավոր շտաբի տվյալներով՝ խախտումներ են տեղի ունեցել Հունաստանի օդային տարածքում Էգեյան ծովի հյուսիսարևելյան, կենտրոնական և հարավարևելյան հատվածներում։ Բոլոր դեպքերում հունական ռազմական ինքնաթիռները բարձրացել են թուրքական ինքնաթիռները որսալու համար, ինչը, միջազգային պրակտիկայի համաձայն, ստիպել է խախտողներին լքել Հունաստանի օդային տարածքը, ընդգծել է Գլխավոր շտաբը։