Լրագրող ներկայացած անձը փորձել է մտնել գիշերային ակումբ․ այնուհետեւ ահազանգել է, թե ակումբում ռումբ է դրված

Այսօր, հունվարի 9-ին, արտակարգ դեպք է տեղի ունեցել Երևանում։

SHAMSHYAN.com-ի հաղորդմամբ ժամը 04։10-ի սահմաններում Արտակարգ իրավիճակների նախարարության Փրկարար ծառայության 911 ճգնաժամային կառավարման կենտրոն ահազանգ է ստացվել, որ Տերյան փողոցում գտնվող «Պոլիգրաֆ» գիշերային ակումբում պայթուցիկ սարք է տեղադրված։

Ահազանգողը հայտնել  է նաև, որ ինքն այդ տեղեկատվությունը ստացել է մոտ 30 րոպե առաջ։ 

Տեղազննման արդյունքում պարզվում է, որ ահազանգը կեղծ է։ 

Ֆոտոլրագրողի տեղեկություններով՝ ոստիկանության Կենտրոնական  բաժնի ծառայողները՝ բաժնի պետ Արման Պապյանի գլխավորությամբ, պարզել են կեղծ ահազանգի հեղինակին, ով ներկայացել է, որ ինքը լրագրող է և ցանկացել է մտնել գիշերային ակումբ, սակայն նրան թույլ չեն տվել, ինչից հետո նա կեղծ ահազանգ է տվել։