«Քաղաքացու՝ իր հաշվին թեստի վճար կատարելու պարտականությունը հակասահմանադրական է». Վարդևանյան

«ՊՇՌ թեստերի վերաբերյալ ՍԴ որոշումը երկու հանգամանք շատ հստակ ֆիքսել է, առաջին, որ քաղաքացու՝ իր հաշվին թեստի վճար կատարելու պարտականությունը հակասահմանադրական է»: Այս մասին այսօր՝ հունվարի 18-ին, ԱԺ-ում լրագրողների հետ զրույցում ասաց ԱԺ «Հայաստան» խմբակցության պատգամավոր Արամ Վարդեւանյանը:

«Երկրորդ, ՍԴ-ի որոշման մեջ ոչ մի հիշատակում չկա բարերարի մասին, հարեւանի մասին, բարեկամի մասին: Կա հիշատակում պետության մասին: Որոշման մեջ բառացի գրված է, որ պետությունը պետք է միջոցներ ձեռնարկի սոցիալական  համերաշխության օրակարգով եւ այդ միտքը ասում է այն կոնտեքստում, որ ՀՀ-ում նվազագույն աշխատավարձը 68 հազար դրամ է, ՊՇՌ թեստերի արժեքը 15-40 հազար դրամ կարող է լինել: Այդ կոնտեքստում պետությունը պետք է միջոցներ ձեռնարկի սոցիալական համերաշխության օրակարգով: Եթե այս իշխանությունները այս պարզ ճշմարտությունը չեն ուզում ընկալել, դրա հետեւանքները կրելու են այս կամ այն ձեւով: Մարդկանց վրա հակասահմանադրական պարտականություն դնելը ինքնին հետեւանք պետք է առաջացնի: Այս իշխանությունները տեսնում են, որ իրենց գործողությունը հակասահմանադրական է, դրանով հպարտանում են»,-նշեց ընդդիմադիր պատգավորը:

Հարցին՝ պետությունը պետք է փոխհատուցի՞ թեստերի գումարը, պատգամավորը պատասխանեց.

«Ես ազնվորեն ասում եմ՝ ՍԴ-ն դրա լուծում տվողը չէ, բայց ՍԴ-ն կարող է հուշում, ուղենիշ տալ, որը տվել է: Ես մեր քաղաքացիներին խորհուրդ կտամ, որ գործատուների հետ այս հարցը դնեն կառավարության առջեւ: ՍԴ-ն որեւէ բառ չի ասել գործատուի վրա նման պարտականություն դնելու մասին, բայց պետության վրա դրել է: Թող ոչ մի աշխատող կամ գործատու չվախենա ռեպրեսիաներից: Բիզնեսի կորցնելու խնդիր չի առաջանալու: Վարչական ակտ կարող են գրել գործատուի վրա: Գործառուն դա շատ հանգիստ ձեւով կարողանալու է բողոքարկել վարչական դատարան, հիմքում դնելով ՍԴ որոշումը»,- պատասխանեց Վարդևանյանը: