Բարձր ենք գնահատում Իրանի սկզբունքային դիրքորոշումը պատերազմի ընթացքում. Գարեգին Բ

Բարձր ենք գնահատում Իրանի սկզբունքային դիրքորոշումը 44-օրյա պատերազմի ընթացքում եւ խաղաղության հաստատմանն ուղղված ջանքերը։ Այս մասին ասվում է Ամենայն Հայոց Կաթողիկոս Գարեգին Երկրորդի՝ երկու երկրների միջեւ դիվանագիտական հարաբերությունների հաստատման 30-ամյակին նվիրված «Հայաստան-Իրան. պատմական անցյալը եւ ներկան» թեմայով միջազգային գիտաժողովի մասնակիցներին ուղղված ուղերձում: Դրանում նաև նշում է.

«Իրանի եւ Հայաստանի հարաբերությունները երկու քաղաքակրթությունների եւ կրոնների բարիդրացիության վառ դրսեւորումն են։ Հայաստանի եւ Իրանի միջեւ դիվանագիտական հարաբերությունների հաստատման 30-ամյակը համագործակցությունը զարգացնելու լավ առիթ է՝ մարտահրավերների հաղթահարման նպատակով մի աշխարհում, որտեղ երկակի ստանդարտներ են դրսեւորվում, անհատների եւ ժողովուրդների իրավունքները ոտնահարվում են։

Նման պայմաններում արդիական է դառնում համագործակցությունը հանուն խաղաղության։ Ուրախալի է, որ մշակութային սերտ հարաբերությունները նպաստում են երկու երկրների դարավոր կապերի ամրապնդմանը։ Այս ուղղության զարգացումը պետք է հիմք դառնա տարածաշրջանում կայուն խաղաղության կերտման համար, որի վառ օրինակն են երկկողմ հարաբերությունները՝ որպես երկու քաղաքակրթությունների ու կրոնների բարիդրացիության վառ դրսեւորում։

Շնորհակալություն ենք հայտնում Իրանին հայկական մշակութային հուշարձանների նկատմամբ առանձնահատուկ վերաբերմունքի եւ ուշադրության համար»։