Ալավերդցիները սարսափած էին, նրանք լուսացրել են ավտոտնակներում, մեքենաների մեջ և շենքի բակերում. մանրամասներ՝ ուժգին երկրաշարժից

Երեկ տեղի ունեցած երկրաշարժից հետո համացանցում սկսեց ակտիվորեն շրջանառվել Ալավերդիից կադրեր, որոնցում երևում էր, թե ինչպես են քարաթափումներ եղել շենքերի պատշգամբներից։ Այս թեմայով մանրամասներ ստանալու նպատակով ԼՈՒՐԵՐ.com-ը զրուցեց Ալավերդիի համայնքի ղեկավարի Սասուն Խաչումյանի տեղակալի՝ Արթուր Վարոսյանի հետ: Նա ասաց, որ ավերածություններ չունեն քաղաքում, կան շենքեր, որոնցից քարեր են թափվել.

«Չնայած որոշ քարաթափումներին, շենքերին լուրջ վնասներ չեն հասցվել: Կան բնակարաններ, որտեղ ճաքեր են առաջացել»,- ասաց համայնքի ղեկավարի տեղակալը:

Վերջինս նշեց, որ երկրաշարժի պահին մարդիկ վախեցել էին, խուճապի մատնվել, սակայն հիմա քաղաքում արդեն հանգիստ է. «Մարդիկ, բնականաբար սարսափած էին, որոնք գյուղերում բնակարաններ ունեին, գնացին այնտեղ, որոնք ոչ՝ գիշերեցին ավտոտնակներում, մեքենաների մեջ և շենքի բակերում: Բնակիչները գիշերը անհանգիստ են անցակցրել, շատ ուժեղ երկրաշարժ էր»,- ասաց մեր զրուցակիցը՝ հավելելով, որ այսօր արդեն իրավիճակը հանգիստ է, անգամ, դպրոցներն են աշխատում:

Հիշեցնենք, որ փետրվարի 13-ին, տեղական ժամանակով ժամը 22:25 -ին (Գրինվիչի ժամանակով ժամը` 18:25-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 41.19⁰ և արևելյան երկայնության 43.97⁰ աշխարհագրական կոորդինատներով Վրաստան-Հայաստան` Բավրա քաղաքից 16 կմ հյուսիս-արևելք, օջախի 10 կմ խորությամբ, 5.2 մագնիտուդով երկրաշարժ:

«Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:

Երկրաշարժը զգացվել է Շիրակի, Լոռու, Արագածոտնի մարզերում 4-5 բալ ուժգնությամբ և Երևան քաղաքում՝ 3 բալ ուժգնությամբ»,- հայտնել է ԱԻՆ-ը։

Զվարթ Պետրոսյան