Բնակչությունը խուճապի մեջ չէ, բայց վախ կա. իրավիճակը Նորշենում և Խրամորթում հակառակորդի կրակոցներից և սպառնալից ձայնագրություններից հետո

ԱՀ Մարտունու շրջանի Նորշեն համայնքում մարտի 4-ին ադրբեջանցիները կրակոցներ էին արձակել գյուղի ուղղությամբ, ինչպես նաև բարձրախոսով սպառնացել էին բնակիչներին՝ լքել տարածքը։

Պարզելու՝ կատարվածից հետո ինչ իրավիճակ է համայնքում ԼՈՒՐԵՐ.com -ը կապ հաստատեց Նորշեն համայնքի ղեկավար Գևորգ Հարությունյանի հետ, որն ասաց՝ բնակիչները կրակոցներին սովոր են, քանի որ դրանք պարբերաբար հնչում են, սակայն բարձրախոսով սպառնալը՝ նորություն էր նրանց համար: 

«2 ժամ տևել է այդ ձայնագրությունը: Մի քանի անգամ օդ էին կրակել, բարձրախոս էին դրել, որով ասում էին՝ լքեք տարածքը, մի աշխատեք։ Ռուս խաղաղապահների միջնորդությամբ նոր դադարեցրել են իրենց գործողությունները»,- ընդգծեց նա։

Հետաքրքրվեցինք՝ ինչ տրամադրություն է տիրում գյուղում կատարվածից հետո, արդյոք բնակիչները վախեցել են, համայնքի ղեկավարը պատասխանեց. 

«Ինչպիսին պետք է լինի բնակչության արձագանքը այդ ամենից հետո, ընդհանուր չեմ ասի, թե լավ է, բայց այնպես էլ չէ, թե խուճապի մեջ են. վախ եղել է, ամեն դեպքում»,- նշեց Գևորգ Հարությունյանը:

Հարցին, արդյոք կան բնակիչներ, որոնք ցանկանում են լքել գյուղը, մեր զրուցակիցը կտրուկ բացասական պատասխան տվեց. «Այդ դեպքից հետո գյուղը լքելու ցանկություն չկա, որ այն լքենք, նորից կմիացնեն այդպիսի ձայանագրություններ, պետք է մնանք, որ դա չկրկնվի»,- ասաց նա:

Անդրադառնալով ադրբեջանցիների կողմից արձակած կրակոցներին՝ Գևորգ Հարությունյանն ասաց, որ դրանք միշտ հնչում են, հնարավոր է մի քանի օր իրար հետևից կրակեն, բայց նաև մեկ շաբաթ որևէ հանդարտ լինի:

Նշենք, որ մարտի 6-ին ադրբեջանական կողմը կրակոց էր արձակել նաև Խրամորթ համայնքի ուղղությամբ:

Զրուցեցինք նաև համայնքի ղեկավար Զորիկ Աբրահամյանի հետ, որն ասաց՝  կրակոցները տևել են 5-6 րոպե, և նշեց, որ մեր կողմից ևս եղել է պատասխան.

«Եթե չպատասխանեինք, այդ կրակոցները կարող էին դեռ երկար շարունակվել»,-ընդգծեց համայնքի ղեկավարը՝ հավելելով՝ իրավիճակը գիշերը և առավոտյան հանգիստ էր:

Զվարթ Պետրոսյան