Գյումրիում հայտնաբերվել են «էլիտ Արման Շին» ՍՊԸ-ի աշխատակցի նկատմամբ դիմակավորված ավազակային հարձակում կատարողները

Մարտի 7-ին, ՀՀ ոստիկանության քրեական ոստիկանության գլխավոր վարչության ոստիկանության Շիրակի մարզային վարչության ծառայողները, ոստիկանության Կումայրիի, Մուշի և Ախուրյանի բաժինների քրեական հետախուզության բաժանմունքների ծառայողների հետ համատեղ ձեռնարկված հսկայածավալ օպերատիվ-հետախուզական  միջոցառումների շնորհիվ, համագործակցելով Հայաստանի քննչական կոմիտեի Շիրակի մարզային քննչական վարչության քննիչների հետ,  ոստիկանության Շիրակի մարզային վարչություն են բերման ենթարկել  2 քաղաքացու, տեղեկացնում է Shamshyan.com-ը։

Վերջիններս Շիրակի մարզի բնակիչներ, 28-ամյա Դ. Հ.-ն է և 32-ամյա Ա. Ս.-ն: Նրանք կասկածվում են փետրվարի 5-ին Գյումրի քաղաքի Խանջյան փողոցի թիվ 9 հասցեում գործող  «էլիտ Արման Շին» ՍՊԸ-ին պատկանող գազալցակայանում դիմակավորված ավազակային հարձակում կատարելու մեջ:

Փաստի առթիվ Շիրակի մարզային քննչական վարչությունում ՀՀ քր օր-ի 275 հոդվածի 2-րդ մասի 1-ին, 3-րդ և 4-րդ կետերի հատկանիշներով  հարուցված քրեական գործի շրջանակում նրանք որպես կասկածյալ ձերբակալվել են: